發哥單挑霆鋒：同佢死過！
【蔡志豪澳門直擊】國際巨星周潤發與新一代chok王謝霆鋒合作新片，發哥謙虛表示一年前得知與霆鋒合作，便已積極收身裝備自己，誓要與霆鋒在戲中鬥個你死我活，實行與他死過。
國際影星周潤發、吳辰君、梁敏儀、鍾蕙芝和袁嘉敏等昨日在澳門一間酒店取景拍攝新片《賭城風雲》，可惜天公不作美令一場泳池戲份取消。原本已返房間休息的發哥及發嫂得知有記者等候，特意返回片場受訪，十分友善。問到發哥取消拍攝是否掃興，他笑說：「唔會，今日好多女仔波濤洶湧，食晒冰淇淋場戲先取消。」他表示戲中會穿貼身衫凸點示人，問到是否要保持身形，他說：「一年前知道同謝霆鋒合作就收身，但減極都唔瘦。依家同佢拍嘅未到戲肉，遲啲就同佢你死我活。（鬥chok？）我唔會放過佢，同佢死過。佢係我依家唯一嘅目標，其他事唔理。」對於有指發哥光顧張兆輝太太的美容院，他笑說：「張太每星期都要摸我塊臉一次，佢唔摸唔開心。」問到早前謝賢和狄波拉到片場探班是否叫他照顧後輩（霆鋒），發哥說：「冇，我點會蝦佢，佢咁靚仔錫佢都嚟唔切。（送你燕窩？）我太太（食）啫，我虛不受補，食咗會暈暈哋。」
拒到賭場：唔好累街坊
雖然貴為「賭神」，但發哥表示不會到酒店內的賭場遊覽：「我唔去得o架。（擔心人跟你落注？）害人囉咁咪，唔好累街坊，人哋專注搏殺，性命攸關，輸咗一鋪跳咗落去點算呀！同我打個招呼一轉頭無咗十幾萬就死啦。」他笑言這部片其實是「島」城風雲，與賭無關。至於戲中會否講粗口？他說：「留畀杜汶澤。」發哥又表示有留意無綫節目《星夢傳奇》，現場一見主播林子博便對他說：「你嗰集好感動，難得有情人終成眷屬。等我同你阿頭講畀你『翻叮』，可以拎多幾隻戒指，你係我偶像嚟o架！」談到剛過去的應屆港姐競選，發哥大讚個個都好靚女，對於冠軍陳凱琳被評身材欠奉，發哥說：「港姐唔係美貌與智慧咋咩？仲有身材？依家已經好多o靚模啦。」
同場的吳辰君大讚發哥非常友善，而霆鋒的chok樣則是發自內心，並稱待拍畢此戲後便會努力造人。梁敏儀則透露泳池戲取消反而因禍得福：「見到發哥幾日都唔敢騷擾佢叫佢合照，點知今日取消咗場戲，我哋放飯時佢主動問我哋拎手機同我哋自拍，真係好開心！」
