美國劇集《花邊教主》（Gossip Girl）女星Blake Lively自拍攝《綠燈俠》（Green Lantern）撻着老公賴恩雷諾士（Ryan Reynolds）後，一直少於幕前演出，不飲酒不愛毒品的她，生活健康兼且想生夠30個BB，似乎一心想做少奶奶！
記：記者 B：Blake Lively
記：拍了六季《花邊教主》後，打算拍更多電影或電視劇嗎？
B：拍攝《花邊教主》時曾試過連續18小時不眠不休，而且過去5年幾演過唔少角色，真係好想放假，演番「自己」嘅角色，去吓旅行或者做刺激嘅事。事實上我一直都想《花邊教主》快啲完，等我可以接唔同嘅戲，依家我抖得好開心，工作係重要，我更在乎對生活嘅熱情。
記：可以分享一吓你嘅性格和價值觀嗎？
B：每日瞓醒會同自己講，無理由唔將「今日」成為人生中最正嘅一日，基本上我性格又怕醜又外向，亦都好注重私隱，而且我好想有個大家庭，如果生小朋友，希望可以生夠30個，哈哈！
記：與老公賴恩雷諾士如何相處？
B：其實好幸運可以同個品味比我好嘅人一齊生活，我哋互相影響對方。一齊建立家庭嘅回報好快就睇得到，拍戲拍劇要幾個月先睇到成果，建立家庭就有即時滿足感。
記：平日生活充實嗎？會否與朋友開派對或夜蒲？
B：我唔飲酒亦從來冇試過吸毒，最鍾意成日瞓，而且夜店地方太嘈，根本傾唔到偈，如果我係個好勁嘅舞蹈員就會去！
記：被視為性感女神和時尚指標，感覺如何？
B：一向冇造型師，只係相信自己直覺，想點着就點着，絕對唔會為咗出街滿足狗仔隊而着靚啲性感啲，近期好多人問我婚後打扮有冇改變，好似講到處身於極權統治咁樣，其實我都想時時有改變o架！
記：有冇健身貼士？
B：哈哈！其實人人話我好fit，問我有咩秘訣，我希望可以講吓大話，話自己做咗啲嘢keep fit，不過，我真係冇刻意做任何運動，反而覺得自己身形有唔少瑕疵，但我仍然寧願有脂肪又可以食雪糕！
Blake Lively與老公賴恩婚後生活一向低調，但就愛心爆棚經常探訪兒童病院或為慈善機構籌款等。今年2月Blake就同老公到訪兒童病院陪小朋友遊玩嬉戲，又到一間動物醫院探訪，與箭豬和海狸等動物互動，更偕一班工作人員拍照放上Facebook，院內職員指兩夫婦非常親切友善。另外Blake亦有出席意大利品牌Gucci舉辦的全球性籌款活動，為爭取女性權益出一分力。
出生地：美國加州
出生日期：1987年8月25日
成名作：《The Sisterhoods of the Traveling Pants》、《Accepted》、《花邊教主》
戀情：Kelly Blatz、Penn Badgley、里奧勒度狄卡比奧
文：外娛組