Bobby收火豁達看人生

人就係可以咁脆弱，年初二嗰晚玩玩吓想瞓陣，可能係新年食得太飽，瞓着咗食物倒流入肺引起急性肺炎，醒番醫生講笑話你好彩喇Bobby，今日入嚟ICU得你一個救得番。慶幸尚在人間，睇到嘢喇，但係就插住喉講唔到嘢、郁唔到，於是就寫字問醫生，第一句就問我係咪中風呀？醫生話唔使驚，係急性肺炎啫，其實當時唔知肺炎係咩嚟，哈哈，總之郁得就得啦，最驚係中風。

喺ICU過得非常辛苦，昏迷嗰陣我係知、有感覺嘅，好似啲醫護人員搬我過床、醫生照我瞳孔我係知嘅，只係想郁郁唔到，好彩搶救得快，醫生話醒遲啲個腦缺氧可能會蠢啲o架。醒番之後仲未知入咗ICU，覺得啲儀器好嘈，問醫生可唔可以轉房，醫生話呢度係ICU，Bobby你仲想轉去邊？真係人一世物一世囉！當時個人好攰，一合埋眼就瞓覺，又驚再醒唔番，身體周圍都插滿晒儀器，真係肉隨砧板上，哈哈，醫生話我醒嗰刻係突然間瞪大對眼。依家身體好番晒喇，醫生話我可能做得好事多，叫我繼續做多啲好事。喺醫院落床照鏡感覺對眼積埋唔夠瞓嘅疲勞都清晒，感覺好似重生咁，所以把口仲衰過以前、仲毒，哈哈。

經過今次件事同老婆感情更加好咗，知道老婆好擔心我，出院嗰刻大家都頂唔順好感動，同老婆一向都唔使傾，佢EQ好高，好犀利，講嘢一句起兩句止。送好多嘢畀佢啦、樓、車、鑽石咁……其實冇嘅，我哋唔係講呢啲，本身已經去晒佢度，咩都喺佢手啦，屋企嘢一向佢負責，我只係負責簽名，呢個係我最信o架啦。自己對人生嘅睇法都有改變，珍惜眼前人，唔止係老婆、家人、朋友，甚至平時所見每一個人都要珍惜，難聽啲講有今生冇來世，唔好立亂發脾氣，我脾氣唔係大家覺得咁好，唔夠瞓就嚟料。

重生後的Bobby，不敢放肆夜蒲。	歐陽震華	關詠荷被Bobby讚是好戲之人。

依家出去飲嘢都冇以前咁狼，唔好食到咁飽，以前玩親都要盡興蒲到四五點天光，依家睇錶兩三點走喇，聽晚再玩囉，朋友讚我識諗過以前，道行高、頭腦又好咗，十五二十、骰盅都好咗，哈哈。食幾多着幾多整定，要過就檻得過，大步檻過。

關詠荷最夾藝人之一

講到好拍檔關詠荷（Esther），佢不嬲都有戲癮，之前要湊女，依家個女大啲，今次搵佢拍《情逆三世緣》前，都問咗家輝先，家輝亦贊成，話Esther好鍾意做嘢，如果家輝話唔好就弊o架喇，我哋好難搵對手，年紀太大又唔得、太幼嫩又唔得，難溝通，揸住電話仲多過揸劇本，關詠荷就唔會揸電話，佢鍾意揸劇本嘅。

對上一套同Esther合作係《金裝四大才子》，今次我哋再合作，感覺冇分別，我保持一貫水準成日NG，哈哈，當然係有要求先NG，關詠荷係我其中一個最夾嘅對手，你唔識佢會覺得佢好嚴肅，蔣志光話係我先搞得佢掂，我都係氹吓佢開心、同佢傾偈，佢等埋位時郁都唔郁o架，所以冇人敢撩佢，Esther話同我合作開心過家輝喎。

套劇收視見到三字得就得o架喇，呢線劇正常係低過下線《衝上雲霄Ⅱ》嘅，出街食飯啲人都話有睇套劇，話啲gag位好好笑，好Bobby，但係啲gag位都驚畀人鬧，包公點會講啲咁嘅嘢o架，講晒英文得唔得o架，做包公太多鬼馬表情都驚畀人話誇，同編審傾過叫我放心去做啦，你知依家啲觀眾幾奄尖，要用對白去包裝，好似「威武」由來、你咪黐咗鬚嘅蔣志光，都係臨場度，喜劇就係咁要同對手撞出嚟。

飲水思源 報恩TVB

十一月會再開劇，自己鍾意做嘢，未諗到退休歎世界，咁早歎驚唔夠使，哈哈。做嘢都係娛樂，如果講大陸同香港拍劇，自己會享受大陸多啲，有十個鐘休息，夠時間瞓吖嘛，香港就算畀到十個鐘休息，扣埋車程都係得八個鐘，何況冇呢，大陸就真係畀足嘅。

TVB吸引我，純粹係報恩，做人要飲水思源，講真冇TVB就冇我，條件咪酌量囉，跟住個生活指數就得，你點都畀唔夠我，有心就得。香港嘅遊戲規則係咁，咁多年大家認同，合作關係，冇話冇咗邊個唔得，我返到公司見到啲監製、同事都好開心嘅。講到TVB係呢行收入嘅底線、最低嘅指標，睇你點睇啦，條件講好咗就係咁，冇得怨，我就當TVB幫我賣廣告，佢冇收我廣告費已經好好，應該係我畀錢佢o架，哈哈哈！當然有人搵我過檔，王維基都有搵過我，但係當時仲有合約，咁點傾呢。

後記

Bobby接受訪問當日在銅鑼灣一間餐廳進行，不論食客或餐廳職員見到Bobby出現，他們的反應並不因為有大明星幫襯而愕然，大家只是自然地與Bobby打個招呼、感覺是熟稔的，就當Bobby是一個「老朋友」。

口述：歐陽震華

筆錄：影視組

攝影：黎志輝

場地：Amaroni's（Hysan）