廿四味拒「打手槍」推MV上網
Hip Hop組合廿四味眼見唱片市道不復當年勇，決定暫時擱置出碟計劃，成員陳子聰更爆肚將出碟比喻為「打手槍」，而成員JBS及阿肥更rap到影壇，剃頭接拍古裝片，隨即被隊友取笑新角色是做姣爆太監。
由六個大男孩組成的廿四味一向我行我素，rap出自己的一條歌路，最近新歌《Hot In The 852》講述在香港夏天開P，他們說：「因為香港地區編碼係852，講緊開心輕鬆返香港夏天玩，成班兄弟帶埋啲女去玩。」本以為rap友都是喜愛夜蒲，怎知他們異口同聲地說：「其實我哋唔蒲o架，六個都鍾意返屋企瞓覺，係心態鍾意玩，同埋通常都會帶埋另一半去玩。」
不過今次新歌並非清一色男聲，中間加入電腦混音的女聲，加強愛情感覺，阿肥說：「個個隊員對夏天都有唔同嘅感覺，我覺得同愛人一齊共度一個下晝係好正，歌詞入面加入愛情古仔，所以有女聲出現。其實第一次係我自己扮女仔聲，但係畀Eddie話唔得、唔收貨。」
想突破傳統
他們大嘆香港的唱片市道低迷，將會暫時放低出碟計劃，轉型攻網上世界，子聰說：「都唔知新碟幾時會有，因為我哋想一首新歌就推出一個新MV放上網，唔想跟住傳統模式去做，因為覺得依家出碟係似打手槍（意思：只為個出字）。」
而JBS及阿肥踩入電影圈，剃頭接拍古裝片，百厭的子聰即時取笑隊友說：「係咪做太監？JBS似啲，佢個樣似人妖啲。」JBS更即場太監上身，扮姣爆女腔講對白：「拍古裝係真嘅，不過唔係做公公，我都想做呀，因為公公要好靚仔。」
場地：Club Bisous
服裝：I.T
飾物：Momodesign Watches
文：音樂組