白龍王父母真神論 偉仔受用
【記者戴佩玉泰國直擊】向來篤信白龍王的林建岳昨日與緋聞女友Michelle到達白龍王廟，二人相當閃縮，企到離行離列，有欠大方。白龍王生前的十一條金句近日被網友瘋傳，其中一條「父母才是真神，對父母比神好一點，一切便順順利利。」此金句令信徒之一的梁朝偉一生受用。
白龍王將於9月1日舉行喪禮，林建岳昨日傍晚時分就到達白龍王廟，向來緋聞多多的他與其緋聞女友林寶賢（Michelle）、兒子林孝賢及數名友人分別乘搭兩架七人車前來，眾人一身素服。大概因知道連日來都有記者在場，林建岳與Michelle抵達，見到記者亦相當避忌，Michelle不時耷低頭行，與林建岳企到離行離列，坐時都只是隔着椅子坐，全程可說是零交流。
唔肯受訪 記者動怒
原本白龍王太太師母心情已平復不少，不過當見到林建岳，師母情緒非常激動，連白龍王的細女Pet都忍不住哭起來。期間盧師兄又着記者影相時遠離一點，指林建岳不想受訪，不過現場包括香港及台灣記者近30人，拍攝期間傳媒之間充滿火藥味，林建岳見勢色不對即企定定影相。
期後林建岳參與近一小時的誦經儀式，亦有人帶他入靈堂看白龍王遺像，遺像附近放有師傅生前穿過的衣服，眾人似是作了一點儀式，不過全程都有師兄弟圍住。當記者提到前緋聞女友王祖賢時，林建岳即時轉身上車離去。
教余文樂 專注電影
網上瘋傳白龍王生前教導善信的十一條金句，其實其圈中信徒早已受用，梁朝偉曾表示：「佢講嘅好多說話我都會記住，好似要對人好，孝順父母。」而余文樂則謂：「佢叫我凡事唔好太急，要有耐性，當初係佢叫我專心拍電影，之前轉公司都畀咗唔少意見。」曾志偉亦曾說：「師傅在生時話有錢就捐，唔好買嘢嚟，例如幫啲冇錢嘅人殮葬。」白龍王指點過舒淇要勇敢向前看，用努力贏得無數獎項，舒淇曾向白龍王詢問戀愛運，白龍王卻潑冷水：「感情的事別想太多，順其自然就夠了！」