剛晶B曝光食國寶人奶
霍啟剛BB終於曝光，昨日向傳媒發放一家三口照片，相中BB鼻高、眼大精靈，晶晶則紅粉緋緋，幸福滿瀉。而啟剛還親自現身細說母子情況，自爆一直計劃順產，但晶晶入產房後陣痛廿四小時，最後決定剖腹生B，而「剛晶B」喜獲晶晶餵哺母乳，可真吸收「國寶」級精華。
已故全國政協副主席霍英東長孫霍啟剛與「跳水公主」郭晶晶的愛情結晶品於本月27日誕生，一直備受外界關注，昨日霍啟剛終於現身，還發放一張一家三口的家庭照，相中晶晶着裙抱BB，精神奕奕，坐在旁邊的啟剛手放在晶晶的手上，既恩愛又溫馨。而BB則手仔郁郁，眼仔精靈，鼻樑似足晶晶，又高又直，十分可愛。啟剛表示相片由媽咪朱玲玲操刀，他說：「我叫佢幫我一家三口影相，佢怕醜話平時只係影花花草草，唔係影人，我覺得BB第一次影相要由佢影，佢好緊張，早上過嚟試光。」
爆媽咪催啟山結婚
昨日啟剛會傳媒，罕有地安排在養和醫院四樓演講廳進行，現場逾半百記者，他一早安排一張CD內有一張全家福，還有西餅招呼，整個訪問約二十分鐘，啟剛甫到場心情靚爆講不停，還不時望着手上平板電腦中的講稿。他首先多謝各界的祝福及關注：「我哋本來想低調啲，但大家都好關注生BB呢件事，所以之前我喺微博寫咗啲嘢，亦收到好多香港及內地朋友嘅祝福及禮物，同事講公司啲禮物堆到似貨倉。」啟剛亦多謝家人的緊張，不眠不休update情況，說：「我哋父母都有幫手，我仲未學識點照顧BB，最開心嫲嫲同公公四代同堂，我哋都榮升咗一輩，連細佬都做咗叔叔，大家都多咗責任。」繼又爆媽咪有催細佬啟山，要快計劃人生大事，結婚及生仔。
啟剛續說BB情況：「BB喺8月27日清晨好早出世，重7.3磅，長50cm，呢幾日仲要做好多例行檢查，所以要留院多幾日。」至於BB似邊個？啟剛說：「呢樣見仁見智，你哋自己睇，不過媽咪就話似晶晶多過我，佢都好多動靜，可以話性格似我，爹哋話BB眼好精靈，佢生出嚟時就四圍望，好奇心好強。」被問到順產或開刀？啟剛說：「我哋原本想順產，但入咗醫院廿四小時，可能BB瞓得好舒服，瞓咗係上面（個頭未轉身），我哋由清晨六點等到第日清晨六點，都未生得，醫生建議開刀，話唔好等咁耐，所以決定半身麻醉開刀。啲人話搵大師揀日子，其實係BB揀得好，呢件事我自己都唔記得，係晶晶提番我，兩年前嘅8月27日係我同老婆求婚嘅日子，BB揀呢日出世我都覺得神奇。」啟剛透露有陪入產房，他說：「有喊，當見到BB好感動，好多感受，呢九個月好緊張，好多期待，中間怕有好多變數，最後BB出世當然好開心，第一次抱佢時都有啲驚，始終太細太脆弱。」
夾時辰改名非迷信
另外，啟剛表示晶晶基於運動員出身，產後身體復原很快，他說：「晶晶依家仲喺醫院休息，我哋會聽醫生指示，睇吓出院時能否同大家見面。」至於有冇說話要向晶晶說？他說：「BB出世先知做母親好偉大，但條路先啱啱開始，平時做嘢多數有說明書，今次冇，有好多嘢要學。（再生？）一步一步嚟，不過我都響應政府生多啲。（係咪餵母乳？）母乳對BB好啲，我哋都希望咁做，加上晶晶係聯合國大使，鼓勵餵母乳。」啟剛透露有請陪月：「請陪月要睇眼緣，但我哋盡量想親力親為照顧BB。」
啟剛表示BB還未改名，如果改好名會即時公布，他說：「想夾番出世時辰八字，唔係迷信，但想聽各方面意見，自己喺外國讀書，中文係有限公司，爹哋畀咗好多意見，嫲嫲都話個名好重要。」他否認為BB成立億元基金，不是錢銀問題，最重要BB健康，快樂，就是他倆的最好禮物。亦未有諗擺滿月或百日宴。
文：名人組