筱靖怒轟黃集鋒 踩人博上位
亞視藝人黃集鋒昨於社交網上載筱靖出席活動之走光照，令女方不滿，多番要求刪相，惟集鋒不但懶理，還指筱靖條裙不夠短，兩人因而在公司門口吵大鑊，事後黃集鋒更咬住筱靖唔放，指對方小器、兇惡，筱靖忍無可忍之下決定反擊，不忿被人踩住博上位！
筱靖與集鋒昨日齊齊到政府總部出席《支持良心電視》集會，筱靖更擔任大會司儀，不過她被爆在準備出發時，曾跟集鋒鬧大交。據悉她更喊爆轉身離開，一度想辭退司儀之位，但經工作人員安撫後，才以大局為重頂硬上。
現場筱靖與集鋒同台零交流，不過台下被追問鬧交一事就火花四起，集鋒一開始已反唇相稽，責怪筱靖小器：「有報道放咗佢張走光相，我將個報道上載咗喺社交網站，佢突然氣沖沖話唔准我放上去，我都莫名其妙，佢又兇神惡煞望住我30秒，幾十人睇住，我好無地自容，大庭廣眾咁指摘我好無辜，我覺得佢可以客氣啲同我講。」集鋒覺得筱靖性格霸道，既然報道已出街大家就可見到，若不想走光下次不應該穿短裙，既然被影到就沒理由不讓他上載。
有人搞八婆是非
筱靖起初對事件不欲多言，但得悉對方不斷攻擊自己，終忍無可忍於電話上大反擊，筱靖說：「我唔係去話邊個對與錯，但我被人寫走光個心已經唔舒服，我亦多次禮貌叫佢刪除，點知佢當眾鬧我，我覺得佢真係好過分，對我好侮辱，不過我唔想當住大家面喊先走出去。」
筱靖直言因公司信任自己才邀她任大會司儀，所以當工作人員安撫後都以大局為重，希望大家可以將焦點放於集會上，豈料對方竟反過來向傳媒申訴，她說：「大家對呢次集會都十分戒備，點知就有人搞呢啲八婆是非，施施然想踩住博上位，我覺得好無奈！」筱靖坦言與對方並無任何仇恨，更沒有轇轕，完全不明對方的用意。
而黃集鋒昨日傍晚在微博透露，已打電話安慰筱靖。
文：影視組