鎮宇 考直升機牌 1個月PASS

電視劇《衝上雲霄II》收視長期高企，當中Sam哥吳鎮宇可謂居功至偉，劇中Sam哥的專業、深情，令一眾港女睇到眼甘甘，而現實中一樣chok爆的鎮宇，除了擁有影帝級演技外，據知同樣是一名機師，持有直升機駕駛執照，是名副其實的Captain Ng。

飾演機師上癮

原來鎮宇10年前拍完《衝上雲霄》第一輯後，就被在空中自由自在的感覺吸引，演機師演上癮，更膽粗粗去考直升機牌，他更曾自誇相對一些要用四、五個月時間，甚至要考七、八次才取得執照的人，自己只用了一個月就神速KO連串的考試，一take pass考獲駕駛執照。據知，鎮宇因為時間不多，他又不想重考，所以很努力，每日都訓練自己記理論。

拍《衝》第一輯時，吳鎮宇就愛上飛上藍天的感覺。

黃秋生笑說不敢坐鎮宇駕駛的直升機。

鎮宇現身在內地工作，記者未能致電他求證，但其一眾好友就證實此事，黃秋生指鎮宇是在內地考試：「我之前都想去新西蘭考，但至少要考一年，喺香港同外國邊有可能一個月考到？（會唔會坐佢揸嘅飛機？）唔夠膽坐呀，都唔知佢技術去到邊！」而《衝II》中的Cool魔張智霖（Chilam）亦指早知鎮宇有直升機牌，但不會羨慕，還笑言：「我畏高。」而擁有直升機牌的名媛趙式芝就指，在外國能夠一個月內考取執照，甚至有速成班只需一星期，但在港就可能要按民航處的規條補牌和補鐘。

張智霖恨合作

而鎮宇曾在訪問中大爆《衝II》拍攝前，Chilam有致電問他會否出演，Chilam還講明有他才接拍，鎮宇謂：「等我決定咗拍，佢先簽合約。」Chilam對此表示：「佢咁講？同佢合作嘅過程相當愉快，希望下次再有機會合作。」

另外，即將踏入結局篇《衝II》，劇情進入白熱化階段，前晚一集更有六位主角連環咀，先有馬國明激咀江美儀，再有傅嘉莉幻想輕吻吳卓羲，最後更有陳法拉向鎮宇主動獻吻，難怪收視平均有32點，最高更有34點。

文：影視組