葉蒨文谷行4吋峰采依然
葉蒨文前晚首次到澳門舉行個唱，年過五十的她性感演出，大晒4吋事業線又跳又唱，全場熱血沸騰。她一心到賭場試手風連番敗北，笑言輸掉千多元險當場暈倒。
【何愫盈澳門直擊】葉蒨文（沙麗）前晚到澳門威尼斯人舉行《葉蒨文 完全是你2013演唱會——澳門站》，全晚換上多套低胸戰衣，尤以開場的金色低胸露腰高衩裙最為性感，除大晒長腿外，更谷出4吋事業線，年過五十的她風采依然。唱完幾首飲歌後，沙麗在台上笑說：「我搵咗好耐先搵到張三百蚊嘅賭枱玩Black Jack，點知一坐低就輸咗千五蚊，差啲暈咗。我今（前）晚會再去賭，如果你哋可以旺吓我就好開心喇！」
埋怨觀眾掛住影相
之後沙麗表演拉丁舞技，與兩男舞蹈員跳足十多分鐘。跳完後，沙麗累得攤在地上回氣，舞蹈員即坐在她身旁Chok甫士，場面搞笑。沙麗全晚三度下台與粉絲握手，更走勻全場，引得全場觀眾爭相上前一睹她風采。不過沙麗上台後即詐型：說「想同你哋擁抱吓、握吓手都唔得，個個淨係搵部iPhone隊住我。」
做「剛晶」BB契婆
完騷後，沙麗透露好友朱玲玲孫兒應未出世：「Loletta（朱玲玲）話一出世會通知我，佢今（前）晚冇嚟可能都係等緊。我同佢講，話好多人都問生咗未，佢話佢都唔知幾時。你哋（記者）仲心急過佢，佢點收埋個BB？唔使擔心，佢一定會同大家分享開心事。」問到沙麗可會當契媽？她笑言：「佢哋（霍啟剛與郭晶晶）咁後生，我都係做契婆啦！」