羅霖生日哭訴：畀條生路我行
前亞姐羅霖與丈夫劉坤銘早前鬧離婚，可惜分手不是朋友，昨日羅霖在其生日派對上向傳媒哭訴劉坤銘跟她爭仔，最後要出動律師和解，又指經常收到令她不安的訊息，望有人可以放她一條生路。
昨日羅霖筵開16席慶生，與老公劉坤銘鬧離婚的她坦言今年是人生低潮，她說：「生日願望係噩夢過去，個人重生，積極照顧小朋友。」她自爆昨日從學校接孻仔劉子晉到其生日派對時發生不愉快事件，說時一度眼濕濕並別過臉，她無奈地說：「前夫（劉坤銘）喺學校同我爭仔。（佢喺學校等囝囝？）係，佢知道今日細仔會嚟我呢個生日會。（過程係點？）我叫工人去接小朋友，工人見到我前夫喺現場，我唔想去，費事鬧交，我一直係用電話同工人及律師聯絡。法律上大家係共同撫養小朋友，律師話我可以帶囝囝走。（有冇嚇親小朋友？）冇，其實之前都試過，但就唔係呢個情況。」
已搞好晒手續
羅霖續說一直以來都勇敢面對，但卻不時收到令她不安的訊息及詛咒：「某人話睇你可以喺娛樂圈紅得幾耐。我希望畀條生路我行，唔好影響到三個仔。」她又激動地說：「將來就算某日我同一個男人一齊同佢都無關，唔好話我通姦，因為我哋已經搞好晒手續。（贍養費方面點？）唔講得，交咗畀律師，等十月判決。」羅霖的三名兒子之中只有孻仔到場出席派對，其他賓客則包括鄭明明、張文慈、莊思敏、黃百鳴等。
鄭明明對於羅霖與前夫爭拗，她勸對方：「要想得開，冇嘢解決唔到。」談到好友劉曉慶結婚，她稱因為怕坐飛機，故未有出席對方婚禮，但就送了七位數的紅寶石戒指給她作賀禮：「佢嫁得好，我好開心，佢係我恩人同貴人，佢令我認識中國，所以佢嘅人生大事，我要送有價值嘅嘢。」她又大讚劉曉慶丈夫脾氣好性格好，而劉曉慶則保養得宜。
文：名人組