譚詠麟拉隊慶生歎豬擦蟹
譚詠麟昨日63歲大壽，人緣甚廣的他頻頻出席慶生飯局。前晚他拉大隊到深水埗「獵食」兼慶祝生日，吸引一班女粉絲蜂擁而上要求合照，心情勁靚的他來者不拒，又踩入廚房介紹美食，不負美食焚化爐之名。
樂壇校長譚詠麟昨日63歲生日，前晚與好友陳百祥及一眾波友拉大隊到深水埗一間中菜餐廳擦蟹慶祝。穿印有A字T恤、紅色波褲配波鞋的校長於10時許到達餐廳，甫現身即被女粉絲發現，一眾蜂擁而上圍住校長要求合照。被女圍的校長心情大靚，有求必「影」盡顯親民個性。
推介美食
問壽星公收到甚麼生日禮物？較早時與兩名金髮美女拍MV、獲送蛋糕的校長即發揮搞笑本色，笑騎騎地說：「有呀！哈哈哈！今日（前日）拍MV嗰時，一個食四個睇嘅。」之後他親自到店外揀蟹，店員特地為他揀了一隻新鮮的大雪蟹。之後校長再踩入廚房，化身食家夾起一隻烹調中的豬手，並向現場記者推介，直豎拇指大讚好味。當晚校長又獲陳百祥等送上乳豬及巨型壽包慶生，校長亦不負美食焚化爐本色，即場狂擦壽包及其他美食，有心有力。
眾星祝福
另外，不少圈中人在網上向校長送上生日祝福，有線主播衞志豪、黃杏秀、吳家樂及錢嘉樂等，紛紛祝他年年二十五歲生日快樂，認真搞笑。
文：音樂組
攝：追蹤組