連詩雅拒叫男友買M巾
歌手周柏豪與連詩雅（Shiga）昨日到旺角街頭玩快閃音樂會，吸引近百歌迷圍觀，更有自稱來自美國的女粉絲撐場，二人都話玩快閃氣氛好好，有意再搞，着住熱褲騷長腿的Shiga就絕不擔心落旺角會蝕底，因為有師兄柏豪保護。
柏豪與Shiga都指入行後甚少落旺角行街，Shiga又話自己會喬裝去「濕平」，尤其買內衣褲時怕尷尬，更加要包到實，保持私隱。在旁的柏豪建議Shiga可以上網買「私人嘢」免卻麻煩，但就被Shiga反駁：「呢啲嘢要自己試o架！」問到柏豪可會大搖大擺買condom？柏豪即刻詐傻反問：「咦？condom係咩嚟o架？」
提女友扮懵
另外，又問Shiga可曾叫過男友幫手買M巾？她就直言：「冇試過，有啲嘢唔可以叫男仔幫手，例如拎手袋，要尊重佢哋。」相反，柏豪就話婚後絕不介意幫另一半拎手袋，至於拍拖呢？他笑言：「相信我揀嗰個女朋友唔使我拎嘅。」問到是否指現任女友？柏豪繼續扮懵，九唔答八話：「咩話？我本身冇手袋，我得背囊咋，哈哈。」
文：音樂組