莊思敏背開中門 揮低SM女
藝人莊思敏前晚「影後」上身，出席新戲《重口味》首映禮時晒背撼贏一眾波女，就連露波邊的SM女張淨思都要企埋一邊，莊思敏笑言常常為玉背做護膚，不介意裸背拍戲，但機會屬誰就視乎先到先得﹗
《重》片前晚假北角舉行首映禮，場內「艷」光四射，演員關楚耀、衛詩雅、泳兒、陳偉霆、許亦妮、邵音音、孫佳君、蔚雨芯、Celia K.等均現身支持，而於戲中飾演SM女的張淨思「重口味」以SM裝束亮相，擠出波邊搶去風頭，豈料莊思敏來個玉背中門大開，「影後」上身成功揮低一眾對手。
陳偉霆派定心丸
事後莊思敏透露有着Nude Bra，因為透視關係不能真空上陣：「大風少少都會走光，所以我要盡量留喺室內！」莊思敏表示閒時有做背部護理，自己可以接受裸背拍戲，問到機會是否留給緋聞男友葉念琛？莊思敏即說：「咁睇吓邊個搵我先！」
至於陳偉霆近日被拍到女友蔡卓妍到橫店探他班，兩人僅住廉價賓館，陳偉霆解釋是劇組安排的住宿，問到是否睡同一間房？陳偉霆無奈說：「無必要講得咁清楚，（你話分房都奇怪啦！）咁咪係囉，不過依家我重心放喺內地，有時間我哋就會見，希望大家畀多啲空間我哋。」有指阿Sa現時是怕他有狂蜂浪蝶？陳偉霆即大派定心丸，指對手戲都是男性。
無可能取代師姐
另外，Celia K.承認今次代替師姐陳靜（DaDa）宣傳，問到是否如報道指獲力捧取代對方？Celia K.即說：「我無可能取代佢，不過陳靜有打畀我，叫我畀心機拍《喜愛夜蒲3》，佢依家病緊。」Celia K.稱不介意執二攤，自己僅是打工而已。文：影視組 攝：唐豁莊