陳嘉桓搵代言黑手洗底

陳嘉桓（右）及何紫綸白滑非常，兩人碰面不時交流護膚心得。

女星陳嘉桓（Rose）昨日以代言人身份出席護膚品牌「美肌之誌白滑調色LEVEL UP」活動，該品牌也是她入行後首個代言的產品及廣告。她透露早前到了內地佛山拍處境劇：「今次係我第一次拍劇，呢套係大陸劇，幾好玩。（有幾多集？）有幾季，呢次係四十幾集。」而明顯曬黑不少的Rose解釋：「喺香港開工嗰陣曬黑o架，因為開工好多時都係着背心，同埋啲反光板反到我黑晒。（咁黑點做護膚代言人？）我塊面白o架嘛，但對手啲色食得太入，要慢慢先可以白番。我返大陸拍劇已經白番啲，想有全身美白嘅代言。（要畀人摸o架喎？）咁手腳美白啦。」問她若屆時要她穿比堅尼上陣拍廣告可會接受？她說：「要問番公司。（你自己呢？）依家仲細，有好多工作上嘅新嘗試，可以一步一步嚟，好似之前戲入面飾演援交少女都幾大膽。（咁即會唔會着比堅尼上陣？）真係要問公司，要睇師傅嘅意思，會尊重師傅嘅諗法，如果公司認為OK，我都OK。」

• 陳嘉桓昨率歌手譚晴（右）及模特兒黃詩思（左二）等出席活動。

何紫綸努力「湊女」

另外，同場的模特兒何紫綸（Ann）近日經常上載她姨甥的照片到社交網站，令人誤會是她的囝囝，她謂有奶粉商提出想她與姨甥仔拍廣告。成立了經理人公司的她透露最近簽了兩個女新人，要像湊女一樣湊她們，更稱若能像施念慈般成功轉當經理人，便可轉做幕後。

文：名人組