朱晨麗林夏薇離鄉捱世界

林夏薇與朱晨麗兩位來自內地的演員，回想當日單身來港發展，廣東話都唔識多句，朋友不多連傾訴對象亦欠奉，可謂百般滋味在心頭。而身為林峯堂妹的夏薇，直言堂哥關係令其添無形壓力，需付出雙倍努力，為的只是獲得外間認同！

朱：朱晨麗　　林：林夏薇

朱：對你第一印象係你初入行，喺電視見到你嘅skin care廣告好靚，成身白色好清純，覺得你係一個好斯文嘅女仔，識落之後發現你都幾好笑同開朗。

林：你當年港姐我有睇，仲同屋企人估你係冠軍，當時覺得你有氣質，好淑女，又識跳舞，本身特別欣賞識跳舞嘅女仔，後來喺化妝間傾傾吓就識咗，覺得你都幾健談。

朱：初頭以為你講廣東話，點知講講吓你同我講普通話，感覺好似親人咁。

林：你都幾傻大姐，幾多嘢講，好開心。我自己因為嚟香港做嘢，話劇做咗一年好少少，不過都唔知香港文化，未係好識廣東話，跟住做做吓吸收人哋講嘅嘢咋！

朱：我呢方面到依家都好差，點解你咁叻？以前喺演藝有外國人、朋友，香港朋友會就我講普通話，選港姐講自己名都唔夠膽講，入咗tvb先真正去學習。

林：最困難時期係舞台劇轉電視，有啲誇張位要收番，劇本記好熟。

朱：你做戲都好自然，我第一套《名媛望族》好大壓力，語言係好大問題，太多重戲份，監製都話對一個新人嚟講好難，特別係對白記唔切，佢哋驚我緊張都會輕提我，驚講得多我仲緊張。咁你有冇試過演嘅角色畀人鬧？

林：有！《幸福摩天輪》時畀人以為係第三者，其實鍾嘉欣先係，《初》劇角色刁蠻，盡量演到唔乞人憎，其實有對比先好。做好自己嘢，人哋啱咪聽，有啲人係惡意，自己要識分。

朱：有時覺得自己係咪好執着，畀人鬧啲字眼太過份，但依家諗通明白世界係現實，學識放下。

林：咁你又點睇緋聞？我哋好似都冇乜，我字典入面剩係傳過同袁偉豪！但佢有女朋友㗎！寫到我好似小三，當時剛入行都有唔開心，真正明白原來娛樂圈係咁嘅。

朱：其實我冇咩緋聞，根本都冇同過李晉強拍拖，冇開始過又點分手？馬國明嗰單都係假，不過又驚答錯問題得罪佢啲支持者，佢係筍盤嘛！之前所講嘅同車，其實後面仲有個人，咁大家鍾意，又講多次啫！之後仲有情侶檔活動，良性去傳可以接受。

林：既然係咁，咁你理想對象係點樣？

朱：要孝順屋企，唔係都唔會錫你，外形心地好就ok，依家女人有錢好過靠人，有安全感好啲！

林：你都啱，孝順對我好緊要，其他冇特別要求，女人要靠自己，唔好冇咗事業，有冇錢係其次，前提係對家人同我好，藝人拍拖已經有壓力，搵同行比較麻煩，圈外又會好痛苦，拖手一定唔得。收工都好攰，有時間都休息，有假期都返廈門見家人啦！

朱：特別係香港，如果另一半係圈外人又有壓力，對方約我出街，冇理由喺街拖手，始終係公眾人物，係好殘忍，所以諗吓先啦！

林：依家凡係同男人出街都係男朋友，上次同舊同事出去，期間約咗導演傾劇本，大家只係坐喺度，冇做任何嘢都有人影。

朱：講完愛情，都想問你有個堂哥林峯，會唔會對你添壓力？

林：初頭有幫助，後來就無形壓力，但冇得避，啲人覺得我靠佢，其實我都係讀演藝，呢段時間唔知幾長，不過依家好好多，大家開始鍾意我演嘅角色。

林：我個人鍾意畀自己壓力，會精神緊張，就算幾多劇本都要睇晒先瞓，依家好咗要更加努力，比人付出雙倍努力，羨慕阿哥拍拖？佢開心就得，年紀又唔細。

朱：藝人都係普通人，都要生活。

林：難得搵到個咁鍾意，好佩服，佢不嬲都細心，好錫家人，依家戥佢開心。

後生女只要啱傾，識一日都可以好Friend！林夏薇與朱晨麗就係例子，私下並沒有經常聯絡，但甫一見面即講唔停，兼且笑聲頻率甚高，惟細聽她們所說，卻未能找出主題，難怪夏薇笑說：「我哋成日都係咁，講嘢冇point，但都唔知點解好好笑！可能有時又國語又廣東話，中間笑料百出啩！」

朱晨麗林夏薇 離鄉捱世界