陳豪有禮茵媺晒巨鑽
廿四孝老公陳豪心痛太太陳茵媺辛苦佗B，前晚公開表示獎賞禮物少不得，現時則為BB在哪兒出生及就學等問題而苦惱；而剛榮升母親的名模Lisa S.就表示待囡囡大一點便會讓她到美國居住！
前晚FOREVERMARK舉辦「承諾之夜」活動，大會請來準爸爸陳豪及剛為人母的名模Lisa S.等出席活動。陳豪被問到送過最昂貴的鑽飾給太太陳茵媺是甚麼？他說：「唔係睇呢啲嘅，送珠寶首飾都係心意，我覺得心意就係最好嘅價值！（遲啲太太生BB要送大禮？）佢佗B好辛苦，好多功夫，禮物唔少得！」又稱有互送小手作。問茵媺打算在港還是外地生育？他認真說：「喺香港同外國生涉及到國籍同就學問題，好多嘢要諗，（係咪佗慈姑椗？）未知。」身在加拿大安胎的茵媺昨與同學仔去看畫展，在微博上載的照片中可見其手上的巨型鑽戒，一臉幸福。
Lisa拒讓囡囡拍廣告
Lisa S.則稱現時囡囡年紀還小，等她約四歲左右便考慮把她送到外國。談到日前女兒的可愛樣終極曝光，可有廣告商邀請她拍廣告？她說：「冇，不過就算有都應該唔會，因為佢太細個喇！」Lisa更笑言育有兒子的朋友也紛紛爭相要跟囡囡「相睇」，令老公吳彥祖每天都很擔心。
同場的黎明愛將文詠珊（JM）穿上一襲low-cut黑色裙，由於胸前設計頗寬，故她不敢烏身免走光。對於被本報獨家拍得與富二代衞以德（Edwin）拍拖吃拉麵，她坦承二人關係「好好」，對方很疼錫及愛護她：「不過仲要觀察，唔可以太輕易就畀人追到。（佢貌似李準基？）我覺得有啲角度都似，但其實我唔着重外表嘅！」
文：名人組