DaDa擺款 恰新丁蕭美卡
陳靜（DaDa）昨率領一眾女演員在中環為新片開鏡拜神，奪得金像獎後，DaDa由o靚模升呢，立即擺款恰同公司的新人蕭美卡（Mika），不讓她與自己和老友郭穎兒（Celia）一同接受訪問。而有寸嘴Barbie之稱的夏尉喻，除了谷盡咪咪兼疑似凸點，左邊腋下更離奇出現成吋長的疤痕！
陳靜、郭穎兒、夏尉喻、雨僑、蕭美卡等一眾o靚模，昨日齊齊倒奶現身中環，為電影《喜愛夜蒲3》舉行開鏡儀式，奪得金像獎後變得密實的女主角DaDa都解封，大騷四吋事業線！
郭穎兒繼續擺款
訪問環節時，本來安排同公司的DaDa、Celia和Mika齊齊受訪，但DaDa就盡顯大師姐氣派謂：「三個人太多啦！我同CK先啦！」擺明杯葛Mika！但Mika就繼續懵盛盛，要工作人員拉走她才知發生甚麼事。事後她接受電話訪問，死撐沒有被師姐杯葛，更指希望邀得師姐們食飯增進感情；而Celia接受電話訪問時，就繼續擺款：「可能DaDa想畀機會新人自己發揮，我都經歷過做新人，冇咁多人識，自然冇咁多訪問！」
夏尉喻疑似凸點
有寸嘴Barbie之稱的夏尉喻昨日盡谷34D咪咪，更疑似凸點，加上左邊腋下有條成吋長的疤痕，引起隆胸疑雲！難怪有傳監製伍健雄不滿Barbie搶晒女主角DaDa和Celia風頭，勒令她要低調。受訪時，Barbie例牌否認遭監製訓話。提到腋下疤痕，她解釋說：「前幾年心肌炎，近期復發，仲有啲瘀血，所以要開刀清咗佢！（驚唔驚畀人話隆胸？）唔會，隆胸唔會隆一邊。」而雨僑就大爆在戲中會一次過與多名韓國男演員肉搏，她笑言：「好混亂呀！『群毆』呀！」
文：影視組