圓圓誓減5磅做靚新娘
還有三個多月便嫁作他人婦的汪圓圓，坦言心情開始感到緊張，為了做個靚靚新娘，她坦言努力減肥，之前甚至試過餓住肚子睡覺，不過圓圓的未婚夫蔡加讚就謂不論她肥或瘦也愛她，令圓圓甜入心！
婚期定於今年11月30日的汪圓圓早於月前已着手為婚禮作準備，她昨日出席SK-II活動時，被問到將於三個多月後舉行的婚禮籌備進度，她說：「仲有3個幾月，都開始緊張，之前幫家姐為姐夫搞個生日Party，依家可以集中精神喺自己個婚禮度。我當嗰個Party係我嘅Pre-wedding，好似Rehearsal咁，學下點去招呼客人，嗰晚我做完司儀後聲都沙埋，開始咳，仲整親手，着高踭鞋着到腳痛，成晚要跑嚟跑去，又冇食嘢。」她指家姐汪詩詩想由自己人擔任司儀，但原來做司儀都很辛苦，故她的婚禮會聘請專業司儀。
曾餓着肚子睡覺
圓圓表示因忙於幫手籌備姐夫的Party而瘦了5磅，卻正合她意，她笑說：「前一排肥咗啲，自己想結婚時瘦啲靚啲，Party嗰晚之後我瘦咗5磅，想再瘦多5磅。不過Karson（蔡加讚）話無論我肥定瘦都愛我，我對佢都一樣。」她說時不禁流露出冧爆甜笑，羨煞旁人。她又透露之前試過用些很瘋狂的方法減肥，例如餓着肚子睡覺。她已訂好婚紗和晚裝，只是仍未看到實物，揀好的鞋有些卻不合腳，喜帖亦在印刷中。
郭藹明認有戲癮
另外，同場鮮有出席公開活動的郭藹明被問到可會想復出拍劇？她坦言：「遇到啱嘅都會。（有冇戲癮？）睇到好睇嘅會有，覺得故事幾好同角色幾好都會想。（無綫有冇搵你？）之前有傾過，要就埋屋企嘅Schedule。（大陸劇呢？）難啲，要同老公夾時間，要有人喺度照顧屋企。」她又謂在網上看過王維基開拍的劇集《警界線》：「覺得有競爭好啲，都支持發牌，可以百花齊放。」
文：名人組