樂瞳低胸晒腩贏fresh亦妮
平日多作少女打扮的歌手樂瞳，昨日宣傳新劇時卻罕有地穿低胸裝示人，輕易打低同場以青春打扮、自認夠fresh的許亦妮，雖然樂瞳輕露事業線及腰肢，惟腰間出現豬腩肉大殺風景，笑言剛過了27歲，打扮亦趨成熟，更指近日已勤舉啞鈴喼弗。
樂瞳、黃浩然、黃翠如、陳自瑤、許亦妮、鄭俊弘、羅鈞滿等昨日齊為新劇《師父‧明白了》宣傳，向來鮮有性感打扮的樂瞳，竟然以一身低胸裝亮相，露腰又露事業線，展現成熟美一面，令人眼前一亮，不過腰間的兩截豬腩肉，稍為打折扣，而許亦妮則反而少女打扮，短裙示人。
對於樂瞳打扮明顯贏了一仗，許亦妮未有介懷，笑指會隨心情着衫，更謂：「我今日有騷腳，感覺好fresh。」樂瞳則透露此造型乃悉心打扮，她說：「呢套劇自己有份，所以都要着靚啲，之前過咗27歲生日，想打扮成熟一點，不過反應似乎麻麻，以前太o靚妹，大家都話睇唔慣，（以後唔想做小妹妹角色？）又唔會，睇導演要求，依家會喺屋企舉啞鈴操弗吓，自己又冇許亦妮身材咁勁，但有啲天賦係操唔到嘅。」
被發哥讚翠如冧爆
而翠如談到該劇上星期平均收視跌1點，得24點，坦言有點失望，但認為觀眾口味很難控制，只要有人欣賞已覺賺到。對於周潤發點名讚她演得不錯，翠如高興表示：「好感激發哥，呢排好大壓力，套劇好多批評聲音，但當日聽到佢咁講個心好甜。」至於因《星夢傳奇》聲名大噪的鄭俊弘，透露出唱片事宜尚未有新進展，一切等待公司安排，近日工作不斷的他，問到可有收到「大支票」酬勞時？他笑謂：「都未知有幾多，最緊要係keep住有工作。」
文：影視組