黃榕轟漏M孫旗低俗冇家教

性感女星黃榕昨日「胸」降動漫展，好友「綠魔」Karl亦有到場支持。身穿黑色箭豬bra襯黑色喱士褲的黃榕成功搶盡「峰」頭，吸引一班龍友喪影。提到「漏M模」孫旗日前寸爆黃榕是「你老模」兼獻上三鞠躬，黃榕反擊：「首先，唔好同我懶friend，唔好叫我做榕姨，叫番我黃小姐。佢真係好低俗！好粗魯！點解呢個女仔咁冇家教？真係好驚。」

「佢唔係舒淇」

問黃榕可覺得自己被年齡歧視？她寸爆說：「好多藝人都好大年紀先影寫真，佢以為自己邊個呀？佢叫孫旗，唔係舒淇呀！一啲都唔識尊重人！」她又稱準備了失業求助熱線給孫旗，暗寸對方暑假過後會失業。黃榕謂：「佢話見到我想嘔吖嘛，我畀定膠袋佢，唔好嘔到周圍都係呀！」問可有四字真言回贈孫旗？在旁的Karl插嘴：「『家屬謝禮』，我哋呢行唇齒相依，希望佢學識互相尊重。」

Karl到場支持趙詠瑤（左）及黃榕出寫真。

孫旗曾在微博寸黃榕三十多歲仍出寫真才是可恥。（資料圖片）

另一o靚模趙詠瑤（Vivian）同樣現身動漫展，送寫真給同場的關楚耀。Vivian自爆被男粉絲送花追求，但已拒絕對方，因自己心有所屬。提到黃榕被孫旗寸是「你老模」，Vivian不屑地幫口：「黃榕係年紀大啲，但佢天然靚，孫旗就有添加。有啲人拎啲假『點』出嚟，真係好意淫。」

文：音樂組