君如空姐look煞食奪最佳衣着

甄子丹前晚舉行五十歲生日派對，同時慶祝與太太汪詩詩結婚十周年，二人更大玩噱頭，以六十年代作為衣着主題，嘉賓們均悉心打扮，競逐最佳衣着獎！前晚九時許，未知吳君如是否趁住近期熱播的劇集《衝上雲霄II》，以一身橙色空姐服裝到賀，她笑言要從拍戲的服裝倉庫尋回這條裙，最搞笑是手拎送給囡囡作生日禮物的小手袋，她笑說：「頭先畫畫吓眼眉先發現欠個袋裝飾。（老公見完呢身造型有冇叫你以後咁着？）哈哈，咁就慘，其實我諗住扮呂奇，又諗過扮番《歲月神偷》個造型，不過啲衫冇keep！」最後君如獲選為當晚的最佳衣着，可謂實至名歸！而老公陳可辛就因在外地工作而晚上十一時才趕到。

陳慧珊撐《衝II》

同場的陳慧珊就於晚上十一時半與老公一同離開，問有份拍攝首集《衝上雲霄》的她有否追看《衝II》？她表示因也在拍劇故少看；對於有觀眾指《衝II》沒有她的份兒很可惜？她說：「我非常支持佢哋！佢哋做都好好睇，（有人話套劇好多飛行知識錯？）完全冇留意，相信大家好努力做好。（你冇參演第二集會否覺得可惜？）No！唔會可惜，每個決定都有原因，當時我家庭第一，時間最緊要遷就到我讀書。」

至於任賢齊就以一身葉問打扮現身派對，他透露子丹囡囡在場內大唱英文歌表演，大讚其歌喉十分好！而場內眾嘉賓亦玩得盡興及互相拍照留念。

文：名人組