馬國明 江美儀 難忘body誘惑
馬國明（馬明）與江美儀自去年在無綫劇集《名媛望族》中演母子後，再在人氣劇集《衝上雲霄Ⅱ》中結緣大玩「一夜情」，更有不少床戲和咀戲，親密接觸令兩人了解加深。像早前到法國拍外景，美儀當上導遊，帶馬明尋幽探勝，又照顧周到灌湯灌水，令馬明媽為之心動，慫恿兒子發動追求攻勢，奈何美儀名花有主，馬明說：「咁投契又識得照顧男人嘅女仔，就係我日後物色女友嘅目標！」
江：江美儀
馬：馬國明
馬母慫恿追求
江：我哋去法國拍《衝上Ⅱ》外景成大半個月，休息時我會周圍explore吓，但馬國明就好悶嘅，佢唔開工可以唔出酒店房，我咪慫恿佢出去行吓，我哋好浪漫呀……去咗羅浮宮、喺倫敦又去London Eye玩咗成日，超正！我同佢講好過坐喺酒店吖！
馬：我冇伴啫！但跟美儀就好唔同，佢好好，知我哋食慣屋企飯，去法國冇啖好食，特登帶我去唐人街飲芥菜鹹蛋湯、食中菜，好正……中國人嘛，始終要食啖飯、飲啖湯！喺呢方面佢照顧周到，我哋仲搭咗成六百蚊的士，買湯返酒店畀其他演員飲，佢哋都好感動。
江：除咗去景點我哋有去shopping，我幾大面呀，有兩大小生羅仲謙、馬國明幫我攞嘢！馬明真係好鬼死要人照顧，連買嘢都要我教，買咩手信都係我幫佢諗埋！不過佢又真係好孝順，去到邊都話第日要帶阿媽嚟。
惜名花有主
馬：我哋又真係幾夾嘅，有次我阿媽睇到我同美儀喺英國、法國啲攬頭攬頸相，美儀又冇化妝，所以阿媽誤會咗佢係另一個女仔，態度怪怪咁，不停話呢個女仔幾好，叫我追，後來我話呢個係江美儀，阿媽即刻好失望。
江：我名花有主啦……不過，我男友（吳君祥）好好笑，早排幫我搞個party，介紹我出場時，竟然話馬國明係我男友，佢就係我緋聞男友喎！雖然你唔係我男友，但你都係電視城筍盤！
等畀女仔征服
馬：講到電視城好似地產公司咁，有好有潛力嘅樓花——陳智燊、優質示範單位——郭晉安，我呢啲唔算筍盤，陳豪嗰啲就算！我不過係外間安呢個名畀我啫！我又冇事業、冇錢，起碼等我攞咗視帝先。其實我心目中嘅筍盤，應該係事業有成、經濟穩定、感情專一，我都唔敢講自己係專一，因為我睇車都鍾意左揀右揀。
江：其實筍盤又唔使專一嘅，你既然係筍嘅就一定多人追，最後同你一齊嘅女仔先有嗰種征服感！
享受被照顧
馬：我真係幾悶，係宅男嚟o架！但好享受被照顧呢個感覺，所以，美儀呢種咁識照顧男人嘅女仔，都幫我認清揀對象嘅目標，起碼我一定唔會鍾意細路女，要有思想、成熟、溝通到，有男人60歲鍾意20嘅女仔，我有時好唔明o架。
江：呢種忘年戀好明顯係body誘惑！好似我哋喺劇中都唔少咀戲，我哋呢段忘年戀，拍嘅時候連天都幫埋我哋，我哋喺巴黎鐵塔前擁吻，當時好凍又落雨，天色都灰晒，點知一roll機就藍天白雲！
馬：我哋呢pair都有運行，可惜太好運，旁邊啲嘢太配合，冇機會嚟多個take！
「怕醜仔」緋聞多
馬國明入行多年，十年前拍《衝上雲霄》時與吳卓羲、黃宗澤、陳鍵鋒齊齊被稱為「S4」而為人認識，四子中以馬明最低調、怕醜又少新聞，隨着無綫力捧知名度增加，緋聞日多，近年更被視為筍盤之一。
較長遠的是馬明被指與曾華倩玩「姊弟戀」，但他倆一直沒有承認，至2008年，有指他與徐子珊拍《甜言蜜語》，子珊曾主動追求。2009年馬明跟李詩韻拍劇，有指他不時為女方體貼送外賣而傳緋聞。及至去年拍《名媛望族》，馬明除與朱晨麗傳緋聞，又自爆到岑麗香家中BBQ。除此之外，與他以兄妹相稱的唐詩詠亦是緋聞女友之一，不過，馬明唯一承認拍過拖的，就只有胡定欣！
文：影視組