楊千嬅：我啲奶貴過黃金
星級媽咪楊千嬅昨日出席活動，鼓勵媽媽們餵哺母乳，她在台上分享初次餵寶貝仔丁進諾（Torres）食母乳的經驗，曾做過護士的她笑言當時亦不知所措。千嬅又「乳」出驚人地指曾在廁所為Torres製奶：「廁所泵奶好唔舒服，感覺好似喺廁所食飯，之後叫人幫手雪住啲奶，佢哋好似驚污糟咁，我心諗，我啲奶仲貴過黃金呀！」
似喺廁所食飯
千嬅在台下接受訪問時透露，老公丁子高已在Torres出世前向她提議餵母乳，至於在廁所泵奶，千嬅說：「好憎喺廁所泵奶，好似喺廁所食四餸一湯，（啲人肯幫你雪奶？）有啲就肯，有啲就咁畀袋冰我，好似買魚咁。」千嬅自爆曾在更衣室泵奶遲遲不出來，笑言售貨員可能誤會她偷竊，更表示曾在公司開會途中去泵奶，認真頻撲！
殘樣凸顯母愛
另外，早前千嬅被指為Torres搵學校而捱到殘樣暴現，千嬅表示：「咁先可以凸顯出我嘅母愛，（話你係怪獸家長？）我唔係怪獸家長，個仔先一歲，playgroup都係一個禮拜一堂，返學嘅嘢，等老公安排，我哋有共識佢三歲前返playgroup唔使強迫。」
文：音樂組