高海寧抓做泳衣騷
無綫咪神高海寧（高Ling）昨到旺角出席《ALCATEL ONE TOUCH SCRIBE HD 8008D手機發布會》，吸引大批途人及龍友圍觀。高Ling身穿緊身露背裙大騷玲瓏浮凸身材，她又自封電話殺手，試過一星期內跌爛三部電話：「一部仲係跌落廁所。（最近有手機爆炸。）係呀，以前我會放枕頭底，媽咪提我擺地下，我又好鍾意用手機煲劇，好在可以用wifi駁去電視機睇劇，唔怕手機過熱。」
高Ling透露最近拍完劇可密密接騷，問會否行泳衣騷，她笑言自己價錢合理及有好身材，但暫未有邀請：「之後會做沙灘排球活動，但唔係泳衣，費事打打吓波跌晒出嚟。」