張致恒嗒漏M模：我衰鹹濕！
「漏M o靚模」孫旗趁書展落幕作最後一擊，自揭跟組合BOYZ成員張致恒（Steven）的陳年性史，聲稱深愛Steven而獻上初夜，更怪「前度」無情o趙完鬆兼劈腿。現已洗心革面的Steven得知慘變女方宣傳性「工具」，知恥近乎勇認錯，坦承與對方一夜情：「我衰鹹濕囉！」
現年21歲的「漏M o靚模」孫旗（Keiko）連日來奇招盡出，自得其樂凸點、「漏M」做紙上明星。眼見書展昨日完結，惟有出絕招爆大鑊求「名留千古」。昨日Keiko向本報自翻4、5年前風流帳，聲稱戀上當年24歲的Steven，約會幾次後就被撩上床，一夜纏綿後慘遭冷落而分手收場。
不過Steven昨日接受電話訪問時，多次否認跟Keiko拍拖，只是一夜情，不認對方是女友。他說：「係有呢件事（發生關係），我以前做咗好多衰嘢。（係咪同Keiko？）其實我唔知佢中、英名，只係有朋友send報道畀我，先有啲印象記得呢件事。」他坦承和Keiko只是「one night stand」的性伴侶，但「一夜過後」已沒聯絡。對於Keiko笑他幾分鐘「完事」，他無奈說：「是但啦，呢啲見仁見智。」
見面尷尬照打招呼
問會否嬲Keiko為見報爆其私隱？Steven大方說沒有嬲怒，會勇於面對自己的錯失及負上責任。他謂：「係怪自己，男人有需要，衰鹹濕囉！不過我信主後，都好努力改壞習慣，畀啲時間我。」他又稱忙拍劇及籌備快將推出的個人福音碟，故沒時間、沒興趣看o靚模寫真，但Keiko的出位言行亦略有所聞。他謂：「我有睇報紙，感覺係佢搞乜鬼呀？呢個年代已經變晒質，為做宣傳乜都得。」Steven稱倘若有緣再見Keiko會感尷尬，但亦會打招呼或跟對方做朋友，不擔心被其他o靚模再爆料。
Keiko接受電話訪問時，對於Steven拒認曾拍拖，她仍堅稱：「同佢拍過拖，我唔怕認，係男人小家啫！（佢話同你一夜情咋喎！）佢記性差囉！」為證沒說謊，Keiko詳述Steven冧她的經過，指男方以公眾人物理由，不便相約出外，要她到訪家中。拍拖期間，Steven不停致電或視像示愛，並說「我好愛你，好掛住你」，又向她稱跟鍾舒漫的緋聞是娛樂炒作。
「一夜過後」變冷淡
揚言很愛Steven的Keiko更謂：「拍拖一個月先發生關係，係自己第一次同男仔發生親密關係，當時我得17歲。」不過轉頭又狂數對方絕情兼一腳踏兩船：「自嗰晚後，佢好冷淡，佢仲打電話畀我，話鍾舒漫知我同佢拍拖件事被傳媒踢爆後發晒脾氣，要我打畀鍾舒漫解釋。我打咗畀鍾舒漫話冇同Steven一齊後，我同Steven就冇聯絡。」Keiko自言慘被拋棄後，傷心得情緒抑鬱及有自殺念頭，幸得家人、朋友安慰，她才可重新振作。Keiko被問Steven是「快槍手」時？她自言要為男方澄清：「佢係正常男人咁。」
文：音樂組