陳嘉桓過度減肥打到暈
一到夏日，女士們最忌被見到肥肉橫生，減肥成為例排事。眾人對減肥的方法各有不同，但最常見得莫過於節食，陳嘉桓因食得太清以致暈低；而模特兒顧婭棋為登國際天橋，甘受皮肉之痛，以針灸減肥。
《香水活動》
陳嘉桓：「試過兩個星期淨係食餅同米粉，食得太清，打功夫嗰陣暈低咗，我諗係因為營養唔夠！」
官恩娜：「試過參加咗一個排毒療程，三日裏面只可以飲果汁，呢個療程除咗排毒，仲有減肥作用，但只可以飲果汁唔食嘢，都幾辛苦！」
《婚紗騷》
楊愛瑾：「三日唔食嘢，只係飲果汁，係一啲修身用途嘅飲料，有唔同味嘅果汁，唔會好寡。」
黃伊汶：「飲鹽水減肥法，以兩羹鹽沖水飲，但已經好想嘔！要即刻去廁所！不過都係好耐之前，依家增肥我至叻！」
《梵高‧盛夏＠海港城》
琦琦：「試過迫自己每日都飲好多水，因為聽講飲水多皮膚會好啲、又健康啲。不過結果搞到自己生濕疹，我睇中醫嗰陣，醫生話我飲得太多凍水，身體就好似啱啱喺雪櫃裏面拎出嚟嘅水樽一樣，會有好多水氣喺瓶身。」
《Roger Vivier手袋騷》
Rosemary：「我會用健康方法，試過設定一個計劃，就係7日唔食澱粉質，飲大量蔬果汁排毒，如果肚餓就食一個蘋果。」
Amanda S.：「如果真係想瘦，就唔好食咁多嘢，同埋我最瘋狂都係不停做桑拿，出一身汗就會瘦。」
模特兒顧婭棋（Masha）：「我試緊針灸減肥，對腳已經有成效，一次要50針，好痛！我好想去紐約發展，所以想保持最佳狀態做好準備，我嚟緊連手臂都會針灸。」