李彩華盛女自強等人愛
同樣是模特兒出身再躋身娛樂圈發展、同樣捱過窮擔起整頭家支出，張文慈（Pinky）與李彩華（Rain）這場girl's talk毫不掩飾談辛酸談展望談抱負。深信耶和華的巧妙安排，兩位「盛女」深信愛情絕對不可以隨便驚動，愛別人之前要先學曉愛自己，刻下樂於做個快樂等愛的女人！
孤單拍劇感無助
P﹕近年大家都經常返內地做嘢，我登台通常都係留1、2日啫，但你拍劇吓吓都要幾個月，會唔會好掛住屋企？起初會唔會好唔習慣？
R﹕都係o架，好似我第一次返內地拍劇，山長水遠抵埗後導演竟然話要等落雪先拍到我嘅戲份，等吓等吓遇啱人哋「十．一」黃金周，劇組工作人員個個都放假返屋企，剩低我一個，諗住打長途電話返屋企搵媽咪啦，但嗰時啲電話卡未有咁流行，打到冇錢最快都要落到北京先充到值，嗰吓嘅感覺真係好孤單、好無助。
P﹕我都試過喺內地拍劇，正值婆婆病危，但點都度唔到期返香港探佢。當時我諗「又唔係為錢，做乜要搞到咁呢？」但明白做演員要專業囉，後嚟等吓拖吓忽然有日全日都由我孭重飛，仲要拍場好搞笑嘅戲，點知就喺呢個時候屋企人打嚟，話婆婆要「走」，叫我隔住電話同婆婆say goodbye，講完之後我喊到崩潰，但抹完眼淚就要埋位繼續，終於明白咩叫真真正正嘅笑中有淚。
R﹕人生有時真係好無奈。
搵錢交母親處理
P﹕其實長年漂泊都係想改善屋企人生活啫。知道你做嘢全部都係為咗家人，之前去跳水跳到成對腳瘀晒…好彩一套《回家的誘惑》令你喺內地紅爆，辛苦有價囉，聽聞依家你一集劇叫價25萬人民幣喎。
R﹕哈哈，托賴啫，我自己都冇諗過有咁嘅機會，好感恩囉。諗番屋企欠債嘅時候，我根本唔知一共欠人幾多錢，總之當時所有搵到嘅錢，都交晒畀媽咪處理，我亦唔敢問佢攞零用，但又唔知點解過得去喎。我份人好鍾意行街買嘢，曾經試過碌唔到卡好尷尬，鬼叫淨係每月還最低還款額咩？有時需要用錢，就喺手袋度搵啲登台利是，拆開又捱到一段時間。其實你都係養人嗰個，應該好明白啦。
P﹕沙士前後我冇簽電視台，冇固定入息，專登走咗去銀行cut晒所有卡，就算連提款都要排隊。諗住唔畀自己亂使錢，點知有日走去銀行攞$1000，銀行嗰位小姐面有難色，停咗好耐然後細聲同我講︰張小姐，你個戶口得番500幾蚊咋。當時我好唔開心，嗰段日子我去做運動麻醉自己，又唔敢同人講，唔敢出街。我一個人要負責3頭家：我自己啦、我婆婆啦、我爸爸啦，壓力可想而知。
R﹕結果呢？
P﹕都捱咗年幾呢啲非人生活，然後簽番電視台，成個人先定番啲。依家就覺得夠使夠食就OK，我自己好少買貴嘢嘅。
做慳妹上網購物
R﹕鍾意買嘢嘅習慣好難戒得甩，不過我依家精明好多，返內地拍劇最享受就係收工返酒店房「淘寶」，衫褲鞋襪乜都買一餐，因為平嘛，仲試過返內地開工之前，計啱時間上網訂嘢，抵埗後即刻可以拆「禮物」。話畀你聽吖，我為咗慳番啲運費，通常都會趁自己喺內地收到貨先訂嘢。
P﹕咁精明咪好多男仔追囉？哈哈。
R﹕依家唔會急於拍拖，希望睇清睇楚啲先，人大咗唔會好似以前咁，一有feel就開始。我覺得上帝愛我，佢會安排一個best of the best畀我嘅。
P﹕祝福你。呢幾年我連蚊飛過都冇隻，不過都唔急。我突然間有種感覺，唔排除自己會係忽然閃婚嗰種，總之遇啱我唔會再錯過，會直接將我嘅想法話畀佢聽，唔需要怕醜，總之引領佢同我步伐一致，喺主愛內齊齊成長。
享受漂泊內地
Rain於內地甚吃得開，不過長年的漂泊相信大部分港星也會想「回歸」問題，然而靚女卻相當享受內地拍劇的工作﹕「梗係啦，有時覺得喺香港，角色嚟嚟去去都係類似花瓶，反而喺內地佢哋會夠膽畀戲我做，好似八路軍啦，打女啦，甚至土匪都試過，乜都試一餐，好有挑戰性。」即使早前參加跳水比賽弄到滿身瘀傷，她卻不以為然，原來宅男女神亦有勇敢倔強的一面。
採訪：影視組
攝影：沈健程
場地：AKA Japanese Cuisine & Lounge
張文慈化妝：Stephen Lau@Stephen Make up
張文慈髮型：Ethan Ng@HAiR
李彩華髮型：Johnny Chong @Hair Corner