鄧穎芝被屈推job爆大鑊
歌手鄧穎芝（Vangie）和裕美前晚原定出席一群星音樂會，最後兩人未有現身。音樂會負責人稱兩人因私人理由推卻演出，因雙方未有簽約，大會亦無可奈何。現場的音樂會海報上仍印有Vangie和裕美的肖像。
Vangie昨透過電話訪問大表不滿，質疑對方有誤導成分：「佢哋一開頭話搵我做嘉賓，封番5000蚊利是畀我，我以為係慈善騷咪應承。當我見到海報先知原來係商業活動，我同裕美傾過大家價錢後覺得唔對路。後尾主辦商知我哋私下傾過就唔滿意，仲同我講個音樂會取消咗，叫我唔使去，所以唔係我用私人理由推佢哋，我覺得佢哋唔應該咁講嘢。」Vangie又指經此事後不考慮再和對方合作。
與大會各執一詞
不過，音樂會負責人與Vangie各執一詞，表示當初已講明是商業性質，又未有提及過「利是」字眼：「大家傾好咗個價，可能佢覺得呢個價只係利是價囉，而且我哋一直係同Vangie經理人傾合作，可能中間有溝通問題。」裕美經理人Vivian亦透過電話訪問稱：「起初唔知係商業活動，到簽約前大家再傾演出費，但冇共識，所以雙方協議咗取消今次合作，但大家保持良好關係。」Vangie提供與主辦方的對話記錄，內容包括對方提出「請你做嘉賓唱二（兩）首歌，有封利士（是）$5000」，以證清白。
文：音樂組