顏卓靈扮鬼冇難度
影壇新貴顏卓靈（Cherry）在電影《迷離夜》中與影帝梁家輝及陳慧琳參演同一單元，Cherry飾演為情自殺的厲鬼，甚有發揮機會！提到需要化上白臉鬼妝，她笑言這方面沒有難度：「我平時都成日整古做怪，就算再肉酸啲都唔怕，反而係角色經歷師生戀同自殺，感情好豐富，演內心戲比較難。」
問到現實中有否遇過靈異事件？Cherry透露小時候曾對空氣說話，回想也「毛管戙」：「媽咪同我講番，有日我玩緊積木，突然對住空氣叫人一齊玩，婆婆又咁啱發咗個夢，見到屋企外有好多衣衫襤褸嘅小朋友，其中一個成日望入我屋企，令我阿媽覺得呢兩件事有關！都幾驚o架！」
