鄭俊弘比賽 緊張嘔天光
日前錄完第三集《星夢傳奇》的鄭俊弘（Fred）三連冠，繼續以最高分勝出，他坦言公司有下令參賽者封口：「公司話會冇神秘感！（梁烈唯喺微博公開講？）佢上次錄完入廠拍劇，冇聽到Briefing。」明日和後日將連續拍攝兩集《星》的他稱確實不夠時間練習，他又撐第三集被out的李璧琦唱得好好。有傳環球唱片有意簽他，他笑言冇人搵過自己，會等公司安排。
演出經驗豐富的Fred卻自爆有「比賽恐懼症」，他說：「求學時期我有參加過唱歌同武術比賽，每次都唔知點解瞓唔着，仲會攬住個馬桶嘔到天光。（咪會無力？）唔會，仲好精神！」
Fred又坦言年幼時已在家人薰陶下，對音樂產生濃厚興趣，他說：「細個屋企人都有夾band，屋企人逼我學彈琴，但真係冇興趣。加上小學6年班嗰陣，學校要我哋學樂器，而我二舅父就夾開band，佢叫我學結他，一學就鍾意到依家。」入行十年的Fred並沒有放棄過音樂，2008年與朋友組成樂隊《Home》，不時在酒吧演出，即使沒有酬勞都不介意。此外，Fred透露曾為買心儀結他，要捱窮食麵包，更差點到銀行借貸！
場地：Tango