瑞瑪席丹：我承認open
擁有黎巴嫩及台灣血統的模特兒瑞瑪席丹（Rima），一副標致面孔及魔鬼身材，令她出道以來有機會跟不少台灣型男合作，早前更因與吳克羣鬧緋聞而聲名大噪。15歲已隻身周遊列國的她，交過五個男朋友，四個是外國人，她認為跟外國男生戀愛簡單得多，好多人說Rima open，但叫人意想不到的是，她竟說：「我承認我係open.....」
大家好，我係瑞瑪席丹Rima，今年23歲，香港人或者對我有啲陌生，不過其實我16歲已經出道，一直都係做模特兒。我爸爸係黎巴嫩人，媽咪係台灣人，我有一個弟弟、一個妹妹。我喺台灣出世，但我都有喺黎巴嫩生活過，所以我識得當地通語法文。我嘅入行經過好老土，就係好似拍戲咁，喺街被星探發掘，因為當時年紀仲細要讀書，所以都係兼職性質，我都係啱啱先大學畢業。
入行以來，我覺得自己好幸運，有機會同好多前輩合作，例如羅志祥、王力宏、汪東城及吳克羣等，喺佢哋每個人身上都學到好多嘢，而佢哋每一個人都有唔同嘅性格，好似羅志祥就好搞笑，同佢一齊做嘢會帶畀你好多歡樂；王力宏就係一個好有才華嘅人，不過佢工作時好嚴肅，不期然令大家都會分外認真；汪東城就好有型，同埋rock味好重；而吳克羣亦係一個好有才華嘅人，而且佢好陽光健康！
唔知克羣有女友
其實好多香港人認識我，係因為我同吳克羣嘅緋聞，嗰次我哋被人影到去睇戲，咁就傳出緋聞，當時睇到報道第一個反應係「點解會咁？」我哋係一大班人去，但出嚟報道就變咗好似淨係得我同佢？仲被人話我係小三，其實被人影到之後克羣有打過畀我，佢同我講有記者影到我哋，但佢叫我唔使擔心，因為我哋大家都知道發生緊乜嘢事，但外面唔知嘅人就會有誤解，所以我媽咪好唔開心，佢覺得個女被人寫成小三唔係咁好！
我同克羣係朋友，但唔係嗰回事，我甚至連佢有女朋友，同埋佢女朋友係邊個我都唔知。有記者話我知佢女朋友係香港一個有錢人嘅家族千金，我都唔識，仲話佢爸爸有四個老婆，我都嚇一跳，我自己就一定接受唔到同人哋分享自己鍾意嘅人，所以我更加唔會做小三。
拍五次拖四個老外
可能因為我係混血兒嘅關係，好多人會覺得我比較open，我承認我係open，但我知道尺度喺邊！無論性感定係男女之間嗰啲，我都好清楚條界線。
十五歲周遊列國
好似我都有好多性感演出，但一定要健康性感，我唔會走錯方向，同埋Daddy好緊張，佢唔鍾意令人覺得自己個女cheap！我十五歲已經同同學仔周圍去旅行，Daddy媽咪都好支持我出去睇吓呢個世界，所以世界各地我都有朋友，尤其係歐洲，亦因為咁我有好多外國朋友，到依家為止我拍過五次拖，有四個男朋友都係外國人，只有一個係台灣男生，我知道台灣男仔好溫柔細心，但我鍾意外國男仔嘅簡單，佢哋乜嘢都冇乜所謂，同佢哋拍拖會好舒服，但依家成熟咗，會學習欣賞唔同國籍嘅人！
俘虜男人有一套
大學畢業後，我仲諗緊自己嘅方向，我冇特別諗過係咪一定要喺呢行發展，我只係想做自己鍾意嘅事，例如唱歌，最近我都有參演一個音樂劇嘅微電影，我本身識得彈琴、結他，希望可以增值自己；我亦識得多國語言，所以都想做翻譯，或者做導遊，自己亦諗過想跟媽咪學煮黎巴嫩菜，然後推出食譜；因為我成日聽到人講，要抓住男人嘅心，首先要抓住佢個胃！
各有各忙致分手
我依家係單身，對上一次拍拖係一年前，因為大家各有各忙，最後就分手收場，不過我年紀仲細，暫時未諗結婚呢個問題，但我都係同好多女人一樣，到最後都係諗住結婚生BB，組織自己嘅家庭！
後記：鬼妹仔無所不談
Rima是個名副其實性格開朗的「鬼妹仔」，訪問時她甚麼也會談，只是談到吳克羣的時候始終有點避忌。年輕貌美的她，人生閱歷亦十分豐富，追求者相信可堆滿一個西門町，大抵不會為了一棵已有人栽種的樹，而放棄豐盛的大叢林吧！
Profile：
姓名：瑞瑪席丹
洋名：Rima Zeidan
三圍：33C-25-33
學歷：關渡基督學院
語言：國語、英語、法語
興趣：彈琴、結他