Dominic錫松岡 糖妹暴醋
男模何浩文（Dominic）被爆做「人肉抽濕機」而遭女友黃山怡（糖妹）狠撇，但有傳情變與第三者有關，Dominic直認與松岡李那激咀後，糖妹竟變「醋妹」而埋下心結，不過他仍心不死揚言會盡力箍煲！
糖妹被本報獨家踢爆因不忿被男友Dominic當做宣傳工具，決定怒斬兩年情，Dominic昨日接受電話訪問時，心情低落的說：「其實幾個星期前同佢（糖妹）傾偈，發現大家工作觀點與角度唔同。（糖妹話你抽水？）識咗佢4、5年從來都冇講過，相信係朋友、公司搞到佢有壓力。」
發誓冇小三
Dominic又指早前他與日模松岡李那兩度在電影中飾演情侶，更要在街頭咀得火辣辣，原來另一邊廂亦激到糖妹慶合合，最終因打爛醋埕而埋下分手伏線：「見面時都feel到佢唔開心，日後我對其他女仔會避忌啲。（糖妹呷醋？）可能係。」
有傳Dominic劈腿，為證明非第三者介入戀情，他義正辭嚴發誓：「發誓，我冇！身邊多女仔朋友係少不免，但唔係導致分手。」強調雙方未正式分手的他會把握機會箍煲：「呢啲嘢要三口六面講清楚，我都想氹番佢。」惟糖妹昨日透過公司「落閘」說：「我哋已經分咗手，唔再回應。」
文：音樂組