子丹博命曬 疑中暑要回氣

甄子丹拍戲出名搏命，早前拍攝電影《3D冰封俠》就玩齊「冰火」兩極，繼今年5月在冰天雪地的長白山拍攝多場打鬥戲後，日前，他又在三十多度天氣下，於香港屯門拍攝一場重頭戲，身兼武術指導的子丹，指揮過百演員演出多個大型場面，由於子丹拍慣大場面，故今次對他來說，沒太大難度，不過，拍攝當日烈日當空，子丹曬足幾粒鐘，並需要在大空地走動，結果，拍攝中途子丹一度感不適，臉色蒼白疑似中暑，需要靜靜坐埋一邊休息，幸好，一向體能甚佳的他，稍為休息喝點冰水降溫，很快便回復狀態，在拍攝末段，更靈機一觸，與過百臨時演員影了一張大合照，留念之餘亦可考慮作電影海報之用！

加入黑色幽默

當日同場還有「老戲骨」盧海鵬，他指自己拍攝此片冇機會同子丹對打感「好彩」，笑言擔心會受傷，又讚子丹造型特別，十足《未來戰士》一樣：「好似阿諾舒華辛力加！」

子丹拍慣大場面，指揮眾人冇難度。	盧海鵬慶幸在戲中不用與子丹對打。	拍攝認真的子丹，不時走來走去度位。

事後子丹接受訪問，談到拍攝當日疑似中暑，他說：「當日係曬，坐埋一邊都只係休息下啫，我拍邊部戲唔辛苦o架，再辛苦嘅情況都試過，冇乜特別！不過，我都試過拍完戲一返屋企就發燒，要食藥休息，不過，第二日又可以繼續開工，我都係辛苦命！（拍呢套戲係咪好辛苦？）唔辛苦，反而我覺得每次拍戲，都希望諗一啲新嘅嘢帶畀觀眾，自己畀自己嘅壓力大過任何辛苦，好似今次，我加咗一啲黑色幽默落部戲度，希望令觀眾有新鮮感。」

偕妻往威尼斯

子丹與太太汪詩詩今年結婚十周年，雖然子丹近年戲接戲，但他也直言已在八月尾請定幾日假同老婆慶祝，不過，都是寓工作於娛樂，他謂：「八月尾我會去威尼斯電影節，到時同埋太太一齊去，順道慶祝。」

文：影視組