智雯胸壓浩信打波印
黃宗澤（Bosco）、萬綺雯、黃智雯及王浩信等昨日為劇集宣傳，昨日生日的浩信獲劇組即場送上蛋糕之餘，更有智雯胸壓他慶生，不過之後浩信背後卻留有「波印」，搞到已為人夫的他大汗叠細汗。
劇集《好心作怪》的演員黃宗澤、萬綺雯、黃智雯及王浩信等，昨出席宣傳活動，昨30歲生日的浩信獲劇組送上蛋糕，智雯玩遊戲時更胸壓他贈興。眾人在台上玩扯大纜，浩信要孭着智雯，高大的浩信孭了一會已面青唇白兼大汗淋漓，最後浩信背部更離奇有智雯留下的「波印」，但「波印」其實是智雯頸鏈上的「波波」造成。
宗澤七位數開舖
對於獲智雯胸壓，浩信說多謝，更表示智雯其實好弗：「係我近排經常捱夜拍劇，搞到個人虛，先會流晒汗。（生日願望？）希望老婆唔使撈，開開心心喺屋企照顧囡囡。（生多個？）壓力好大。（一個同兩個都係咁湊。）等我返去努力吓，呢排開工，個人虧虧哋，唔係好得。」在《好》劇中與袁偉豪有激咀戲的萬綺雯表示，是與老公在家看該場戲：「好尷尬，我話拍呢啲戲效果唔太好，唔可以拍咁多，佢即刻話係。」
Bosco則表示正籌備開餐廳：「喺九龍搵緊舖位，（投資幾多？）閒閒哋都要七位數，同兩、三個朋友一齊搞。」他又表示因朋友多，會在餐廳設貴賓房，問會否裝閉路電視，他笑說：「正常保安嘢都要有。」
Niki恨睇三角褲
身在橫店拍劇的周麗淇（Niki）昨以長途電話與現場演員溝通，Niki與Bosco曾承諾《好》劇收視好會穿泳衣，Bosco昨對Niki說買了三點式泳衣給她，Niki即回應說：「我都想睇你着三角褲。」
文：影視組