周麗淇時移婿易：係男人就得

口述：周麗淇　筆錄：專案組

感激舊愛

Niki對感情事從不張揚，今次鮮有公開感激愛過她、錫過她的男生們，慨嘆緣分未到。

我冇時間去諗結婚這個問題，大家好似緊張過我，哈哈！我份人比較硬頸，以前一定要揀到最好先會同個男仔一齊，冇人可以逼我。一直我都想睇定啲，唔想揀個唔鍾意就拍拖，的確，身邊一直有人追，我人品好，生得唔醜，好正常。

對於感情事，我一向低調，咁耐以嚟，都唔會攞嚟討論！做藝人平日都已經畀人評頭品足，如果連拍拖咁私人嘅事都畀人睇住晒，我辛苦之餘，對另一半都唔公平。拍過咁多次拖，大家都知道我唔會將個過程好似真人騷咁畀人睇，因為我唔係做騷，另一半都好贊成我咁做，只可惜我哋緣分未到，最終唔可以一齊，總之，我真係好多謝愛過我、錫過我的男生們。

羨慕家姐

家姐周汶錡去年下嫁老外Julian，Niki自此多了個外籍姐夫，情路上似是跑輸家姐。刻下Niki生活看似滿足，可是始終年逾三十，話不想結婚，一定呃你。

Niki與鄭嘉穎一段情最為人所知，她亦感激舊愛的愛錫與諒解。	Niki於新劇《好心作怪》與黃宗澤演情侶，收視不俗。	被封為無綫福將的Niki與謝天華於《女警愛作戰》合作獲好評。

我唔會選擇秘婚，都想喜歡我嘅人分享我嘅喜悅，如果有一日結婚，我一定會通知大家。見到家姐結婚，真係一千萬個開心，姐夫錫到佢燶，日日煮早餐畀家姐食，係日日喎，有幾多個男人可以做到呢？真係令我極之羨慕，羨慕佢搵到一個對佢咁真心嘅人。

與家姐感情要好的Niki（左），羨慕對方找到幸福。	Niki（中）見證家姐周汶錡下嫁Julian，感動落淚。	Niki開始發力，北上密密吸金。

有人話，喺啱嘅時間搵到啱嘅人，係一生幸福，講真，我都想係幸福嘅一個，依家我選擇男朋友，唔會再分地域界限，合眼緣，我鍾意就ok，大前提係，佢係男人就得喇！

無綫福將

很多人話Niki是無綫福將，拍甚麼收視也不會差到哪裏去。有大樹遮蔭，她依然未肯安躺在樹下乘涼，從未動筆簽約做親生女。

我唔覺得自己係TVB福將，近日兩個月內上兩套劇只係咁啱，之前都係一年一套，多謝觀眾支持我！有好多人問我，點解唔簽TVB做經理人，其實有乜分別呢？我同TVB關係不嬲都好，我唔係一個多產嘅演員，從來都係重質不重量，我仲想出唱片同拍戲，樂小姐（樂易玲）都知我點諗，合作方式一早已有共識，咁我同親生又有乜分別呢？總之喺香港，除咗TVB，我唔會出現其他電視台。

趕住北上

Niki近年才開始北上，自言起步較慢，但仍希望更多人認識她！

近年好多人返大陸拍劇，講真，真係一個大趨勢，大陸有十幾億人口，地大物博，每個人畀一蚊你都發達啦！我着眼係整個華人市場，北上發展，令更多人可以認識周麗淇。冇錯，大陸拍劇真係幾好搵，只可以講，酬金係香港十倍以上，冇花冇假，真係會有！其實六、七年前我已經有機會返大陸發展，嗰時因為驚一個人去到冇人冇物，所以遲遲未敢實行，到依家，我知道自己遲咗起步。

大陸工作令我進步好多，知道點去適應人和事。依家成日有人鬧TVB飛紙仔，我就不嬲都唔抗拒，可能自己係電影出身，拍電影只係有大綱嘅劇本，好多都係臨場加落去，反而覺得臨場加會令件事更盡善盡美。喺TVB拍劇，齊唔齊劇本我都試過，有時飛紙仔更靈活變通，未嘗唔係一件好事。

後記：

事業競賽上，Niki歌影視三線發展，不難發現，唱歌方面一直大落後。但不到黃河心不死，都說她是硬頸的人，已決意明年首推國語碟，因為她抱着一個「唔試唔知身體好」的心態，係麻甩咗些少，起碼存在贏的機會噢！

髮型：Debby Kwan@Hair　

化妝：Navi Lam　

服裝：I.T