陳豪保私隱 拒B曝光
無綫視帝陳豪早前與花旦陳茵媺（Aimee）在巴黎成婚後，Aimee即返加拿大安胎，陳豪則留港努力搵奶粉錢，昨日陳豪到中環出席活動帶領Model行Catwalk，身穿西裝的他狂Chok樣，雖然已為人夫兼快將做爹哋，但外號「筍盤」的他依然魅力不減，被大批OL Fans重重包圍索合照，他亦笑晒來者不拒。
提到有喜的Aimee，陳豪仍保持低調作風，問到將來會否一家三口見人？他說：「睇性質，到時睇吓點啦！（介唔介意BB曝光？）梗係唔好啦！希望保持私隱，唔關錢事。（Aimee大肚夠三個月未？）等佢返嚟先，遲啲先講，佢中間會返香港。（加拿大定香港生？）未定呀！醫院都未Book，好多嘢未試過，會請教吓身邊朋友。（唔怕返嚟畀人跟？）加拿大都跟到啦！」問到BB是仔還是女？他表示尚未知道，至於Aimee現時佗B身體狀況，陳豪笑住狂答「OK」。
籌備婚宴「進行中」
對於日前被本報踢爆陳豪將於本月17日在多倫多補擺婚宴氹外父，雖然已有賓客承認其事，但陳豪昨日仍故作神秘，只表示「一切進行中」，更謂：「如果有人跟，我冇咩所謂，明白係記者工作所在，但我唔想每一步都同人講，唔想太公開。（同Aimee邊個話事多啲？）所有決定都係一齊傾，由一開始都係。」
另外，對於陳振聰被判罪成，陳豪不欲多加評論，至於是否願意拍戲扮演對方？他笑說：「喜劇版？我驚Handle唔到呀！」
文：影視組