許靖韻坐巴士 遭色狼揸胸
英皇新人許靖韻（Angela）性感打扮現身旺角宣傳新戲，吸引不少龍友圍觀拍照。Angela自爆曾試過坐巴士遭非禮摸胸而留下陰影，但在宣傳期間卻全程大方，且賣口乖指首次拍戲獲益良多，難忘前輩杜汶澤為她度橋獻計「突圍而出」。
Angela簽約英皇後機會陸續有來，公司率先安排她於新片《超級經理人》內「小試牛刀」，夥拍幾位靚女包括思璇、謝佳妤及莊潔夢等於戲中組成組合「OMG」，簽約加盟「經理人」杜汶澤旗下。
摸兩次唔識叫
由於電影上映在即，Angela日前穿上超短裙現身旺角派傳單宣傳，隨即成為風頭躉，問到可擔心人多遭非禮？她竟自爆：「今日唔係好擔心，因為有好多工作人員跟場幫手，不過我讀中學時搭巴士，試過有人用一隻手掩護，伸另外一隻手過嚟摸我個胸，頭一兩次我唔識反應，第三四次先肯定佢有心，於是咪大叫囉，旁人話幫我報警，不過佢見停站即刻9秒9衝出車廂走人。」Angela笑言此後很想學習武術「傍身」。
唱歌要求走音
首次接拍電影的她覺得片場樣樣新鮮，目前忙於灌錄唱片的她更笑言：「有場戲講我自彈自唱，平時嘅要求梗係歌聲悅耳，點知嗰日要求我唱得勁難聽又要走音，難度都好高，好彩阿澤幫我度咗啲gag位，結果幾take就收貨嘞。」
雖然今次與大班女生同場，Angela謂每個角色都性格鮮明，絕無擔心誰搶誰的鏡。計劃年尾推出唱片的她，表示將歌、影兩面兼顧發展，以滿足自己的興趣及表演欲。
文：影視組