余文樂捧NBA 掃貨益老友
公開情變的型男余文樂回復自由，早前到紐約體驗當地文化生活，沒有艷遇的阿樂，病倒異鄉急召醫生到酒店睇症，難得今次有偶像朱祖兒同行，令他非常雀躍，還獲安排親身入場欣賞NBA球賽，球迷上身的他瘋狂掃貨。
剛宣布甩拖的余文樂回復單身，對感情事不欲多談的他，早前應飲品品牌遠赴美國紐約拍攝靚相，在當地逗留了一個星期的阿樂寓工作於娛樂。阿樂五年前曾經在紐約報讀過短期演藝課程，今次能重遊舊地有份親切感，最開心同行有他的偶像兼設計達人朱祖兒作伴。
美國之行最令阿樂興奮是可以親身入場睇NBA球賽，因為客戶知道阿樂是籃球發燒友，所以特別為他撲了幾張NBA門票，他笑說：「我坐個位好好，頭頂就係大電視，有朋友睇直播時，話喺大電視度見到我。」阿樂仲幸運接到NBA球星掟畀觀眾的球衣，他笑言會當寶咁珍藏。」他更在場館內大手筆買了不少球衣和球鞋，仲預埋他球隊班好兄弟，結果塞爆兩、三個行李篋，十分誇張。
特登去剃鬚
攝影師捕捉阿樂在紐約體驗當地文化及生活的一舉一動，例如街頭踩單車、坐公園、逛街、甚至去理髮店剃鬚，阿樂笑說：「去之前我特登留定啲鬚，佢哋幫我預早book咗間好傳統嘅理髮店幫我剃鬚，店員好貼心o架，又噴香水，完全係貴賓式享受，舒服到暈。」
被喻為新一代型男的阿樂在當地可有艷遇？他笑言艷遇就冇，見醫生就有，原來飛抵美國的阿樂就胃抽筋不適病倒，他說：「又痛又嘔，嚇死工作人員，即刻幫我叫醫生到酒店幫我睇急症，好彩冇影響到工作，只係延遲咗少少拍攝。」
文：音樂組