柏豪換電話 冇收超雲call
周柏豪與賭王何家兩位千金的緋聞傳足幾年，可惜全屬「無米粥」煲唔起，而最新消息指剛恢復單身的何超雲發功以短訊攻勢「翻兜」柏豪，不過柏豪否認，自爆原來早已換電話號碼，無緣收奪命追「雲」Call！
型男歌手周柏豪一直深得何家三房兩位千金何超雲及何超蓮的歡心，兩年前更盛傳柏豪與陳山聰同時力追超雲，而在微博互相開火對罵，最後山聰成功追得美人歸。直至月前「雲山戀」正式玩完後，昨日有報道指回復單身的超雲企圖發功，以短訊攻勢務求「翻兜」昔日緋聞男友柏豪。
柏豪昨日出席活動時，一臉無奈地澄清傳聞：「我戥自己無奈，又戥對方（超雲）無奈，全部傳聞都係假。自己冇收過短訊，之前因為同電訊商合作，已經改咗個新嘅靚『冧巴』，舊嗰個好耐冇用。（超雲搵唔到你？）唔知佢搵唔搵到，但我唔會為咗一個人而改電話。」他又指兩人最近沒有聯絡，對上一次見面已是兩年多前的公開活動。
既然型男單身，千金甩拖，問到兩人可有機會發展？柏豪稱：「唔好玩我啦，都冇撻過，我答問題唔叻，假設問題唔答。（有指新歌暗寸失『雲』聰？）絕對唔係，首歌係送畀自己、第時個老婆同埋所有想求婚嘅男人聽，音樂唔係用嚟寸人。」對於報道指超雲泳衣look肉感十足，柏豪說：「畀人喺冇預備情況下影，係件唔開心嘅事。」又謂對超雲身材不作評論。
黃翠如冇艷遇
至於同場的黃翠如即席「擠奶」炮製飲品，又稱剛與洪永城（Tony）拍攝旅遊節目回港：「冇艷遇，同Tony互相阻住大家，我最唔想見嘅異性就係佢。」
昨日超雲媽媽三太陳婉珍的公關回應，三太忙於慈善事業，沒看這類周刊，又稱超雲亦未看報道，目前她尚未返港，至於傳超雲跟周柏豪翻撻？他稱：「佢哋從未開始又何來翻撻呢？」惟在本報截稿前仍未收到超雲回覆。
文：音樂組