鍾嘉欣恨關島出嫁
一年一度的書展快將開鑼，「宅男女神」鍾嘉欣今年亦加入戰團推出相集，力撼一眾o靚模噴血寫真集，可惜嘉欣全以「密實裝」示人，就連落水都着一件頭泳衣，性感欠奉，嘉欣專程到關島情人崖許願，並在情人鎖上寫下「我想結婚了」。
鍾嘉欣日前為處女相集《幸福》飛到關島取景，嘉欣換上多套白色「戰衣」，最性感是橙色一件頭黃間泳衣，僅露出半吋「事業線」，相比一眾谷胸o靚模寫真集較失色，不過單憑嘉欣的一對白滑長腿已成功俘虜千萬宅男心，嘉欣更走到當地的著名情人崖扣上情人鎖，並寫下「我想結婚了」願望。
嘉欣以純潔來形容關島，她說：「呢處好靚，好似係兩個人世界，如果自己結婚都想喺呢度搞。」隨即補充說：「應該係話我希望嫁得出，只係我份人做任何事都冇計劃，煮到嚟就食，神自有安排。」首次推出相集的嘉欣坦言參與不少意見，她說：「今次相集係想帶出珍惜同感恩訊息。」
為音樂會排舞
另外，嘉欣昨日為下月的處女音樂會排舞，與兩名女舞蹈員大跳大唱，期間喪扭腰兼踢腿，唱片公司老闆的何哲圖（Herman）更現身打氣，問到緋聞男友伍允龍有否睇過其舞姿？嘉欣說：「冇人見過，要神秘啲。」對於有傳她能夠開騷多得Herman疼愛，嘉欣說：「Herman係錫我，不過佢都好錫其他藝人，我自己都好努力。」
文：音樂組