黃家強怒轟 紅歌手得把聲
Beyond成員黃家強趁着兄長黃家駒逝世20周年，狠評香港樂壇群龍無首，當紅歌手空有靚聲而缺乏音樂才華，應驗家駒當年一句「香港冇樂壇，只有娛樂圈」。各地粉絲昨在家駒墓前以「火結他」拜祭偶像，讓家駒在另一國度再搖滾熱火！
Beyond主音黃家駒昨日逝世20周年，前晚其胞弟黃家強在電台訪問中，盡訴心聲說：「阿哥，我已經成長喇，你唔使再擔心我，我識企起身自己行。今天我好好，好想你知道。」當年家駒一句名言「香港冇樂壇，只有娛樂圈」，應驗至今仍顯得擲地有聲，家強藉此怒轟現今香港樂壇「蜀中無大將」：「領導香港嗰一、兩個歌手，都唔係音樂人，得把靚聲，唔識寫歌、唔識彈琴，點領導樂壇？某某一開演唱會就爆晒，歌迷唔聽其他歌手嘅歌，個音樂圈子變得好窄。」
家強亦暗示在5年前，一個以慈善名義舉辦的紀念活動中，善款被「抽水」：「我有啲顧慮，5年前我出發點有好多，但捐咗出去唔多。咁大筆錢用咗去邊？我真係有保留，不如自己默默紀念，唔想欺騙觀眾。」而黃貫中與葉世榮亦在微博留言悼念昔日隊友。
柏豪擺烏龍
而昨日來自兩岸三地、日本、菲律賓的樂迷冒着酷熱天氣，到家駒墓前拜祭，其中一名廣州粉絲為偶像變「髮」，剷青成「Beyond」字樣，亦有樂迷專程帶上紙紮結他，夾雜汗水及淚水祭偶像。有團體在銅鑼灣行人專用區，在家駒死亡時間4時15分，合唱《海闊天空》等金曲，逾百途人和唱兼高舉和平手勢，齊向家駒致敬。同樣在社交網站Instagram悼念的周柏豪，卻擺烏龍將死忌當生忌，留言祝家駒「生辰快樂」，結果被網民鬧爆「黐線，抽水都睇吓件事係點。」
文：音樂組