王秀琳走後門 咀完「謊」失失
男伴團團轉的王秀琳（Mango），最近又有新目標。前晚她與一名「矇眼郭富城」的西裝男到中環耍樂，玩至凌晨3時，Mango與西裝男從後門手拖手步出，兩人情不自禁地攬住激咀，之後雙雙搭的士離開。Mango當街啜仔斷正，事後卻矢口否認，竟強調自己當晚不在中環。
現年32歲的Mango，雖然絕迹幕前多時，但感情生活依然多姿多采，身邊不乏男伴的她，年前曾與航空公司太子爺拍拖，其後又先後跟郭富城及黃曉明傳緋聞，兩年多前又搭上台灣闊少，但最終都是分手收場。
鈴聲破壞氣氛
屢敗屢戰的Mango，昨日凌晨2時許，與一班男女友人於中環夜店耍樂，只見身穿黑色lace短裙的Mango不停滿場飛，跟不同男士咬耳仔，即使她被男友人攬腰亦不抗拒。盡興至凌晨3時，Mango身邊出現了一名身形跟其緋聞男友郭富城般健碩的「矇眼西裝男」，兩人手拖手從後門離開。
當行至暗角位，他們情不自禁當街攬住激咀，Mango更肉緊地搭住男方雙肩，男方亦禮尚往來，纏綿7秒後，男方電話突然響起，於是又匆匆拖住Mango行出大街。腳踏5吋高踭鞋的Mango，因男方行得太急趕，期間差點仆倒。當行至街頭，Mango顯得十分避忌，並即用手袋遮面，其後雙雙搭的士離開。
前言不對後語
昨日本報致電Mango，提到當街啜仔斷正，她緊張地說：「冇可能，我前晚就有去中環，尋晚冇去過，尋晚去咗銅鑼灣唱K。（影到中環拖手喎！）咁恐怖？點會拖手？一定唔係，如果我拍拖，我實會話畀大家知。」其後再三追問下，她竟然一改口風，並口窒窒說：「我唔知呀！唔知發生咩事！（影到激咀！）冇可能，朋友咋！（係咪追求者？）我唔知呀！」明顯前言不對後語。
文、攝：追蹤組