陳海琪 難忘家駒對樂壇有火
資深傳媒人陳海琪跟Beyond可謂識於微時，提到和黃家駒初次邂逅，她大讚對方態度誠懇：「第一次見面佢知我喺電台做，拎住《再見理想》嘅卡式帶畀我，睇吓我有咩可以幫到佢。（點吸引你播佢嘅歌？）因為佢當時表情好誠懇。」
她笑言家駒在音樂以外有一種鄰家男孩的感覺：「佢除咗音樂，好多嘢都冇所謂，係一個非常nice嘅人，搵佢傾偈佢肯同你傾。」提到家駒生前似乎對樂壇失望，陳海琪說：「佢冇灰心，只有憤怒，佢覺得香港有娛樂圈，冇音樂界，大家聚焦嘅嘢唔同，佢想人哋明佢啲歌講咩，但人哋聚焦喺佢女朋友同搵幾多錢。」