Kary失戀怕（火羅）潛水療傷

吳雨霏自去年與網球王子洪立熙分手後，有傳向來鍾情運動型男的她，主動發功「女追男」，成功冧掂余文樂。相戀不久，兩人在今年情人節被拍到在赤柱密會睇樓，同月再被踢爆「蜜」遊英國。期間雖然被《好報》踢爆Kary行「奶奶政策」及進佔男友社交圈，務求mark實「筍盤」樂仔，奇招出盡，但可惜仍被狠「霏」收場，短短半年game over！

多次鬧交

據知「樂霏」甩拖的原因是兩人性格不合，當中最令樂仔不滿的，是Kary猶如「貼身膠布」，相當黐身，就像Kary金曲《逼得太緊》，想不到歌中女主角今次卻是自己，最終逼得樂仔把心一橫，在大半個月前第二度嗌分手。其實兩人戀情剛萌芽時，已傳出樂仔嫌對方太癡纏而提出分手，不過最後被女友打動而重投懷抱。

雖然「樂霏」每次見人都會表現sweet爆，實情私下多次為瑣事鬧交，而月頭生日的Kary當時只上載慶祝獨照，未見樂仔影蹤，早已響起分手先兆。但兩人為保面子，經常扮恩愛，實質此情不再！二人分手亦拒向身邊朋友洩露半點風聲。

麻醉自己

據Kary身邊好友爆料說：「佢唔講係因為怕（火羅）爆，啱啱拍拖時，佢見朋友都會成日晒命同樂仔幾咁開心，但大半個月前，我哋想搵佢出街但音信全無，我都略知一二o架喇，身邊朋友一直都唔睇好佢哋，因為嚟得太快、一時衝動太早公開，不過怕Kary唔開心都唔敢多言。」

被卸去「樂嫂」光環的Kary自分手後大受打擊，決定拒見朋友玩失蹤，隱世匿埋療情傷，她更無聊到超市買餸，與女助手玩煮飯仔，近日又以工作麻醉自己，其唱片公司表示Kary將於年底出碟而忙於錄音，並拒絕回應私人事。至於樂仔發言人亦稱：「多謝關心，私人事唔回應太多。」。雖然舊情不再，但兩人在Instagram仍然互相關注，以行動證明再見亦是朋友。而最離奇的是，一周前樂仔妹妹上載與樂仔及爸爸遊泰國照片，恰巧Kary亦同時上載一張泰國摩天輪照，未知是「分」後心有靈犀旅遊散心，還是轉玩地下情？

文：音樂組