甄子丹難過發哥難忘師傅
劉家良病逝是電影界一大損失，不少影星紛表嘆息，「宇宙最強」甄子丹在《七劍》中與師傅手合作，子丹說自細看劉師傅電影長大，指對方乃影壇「一代宗師」，心情難過的子丹望師傅流芳百世。
曾與劉師傅合作電影《老虎出更》的周潤發，聞得對方逝世為之愕然，他說：「聽到呢個消息好愕然，希望佢老人家走得唔辛苦。雖然我哋十幾年冇見，但以前一齊喺新藝城工作成日見面，早幾年佢攞金像獎終身成就獎，我都戥佢開心！最難忘係拍由佢執導嘅電影《老虎出更》，我唔係武行出身，佢特別幫我度一啲可以突出我身手嘅招式，佢真係好照顧身邊人，同好肯提攜後輩，係電影界之寶。」
身在內地的成龍，對劉家良之死懵然不知，還反問記者：「哎呀，佢幾時走？好多年前我哋合作過《醉拳Ⅱ》，雖然生老病死係人生必經，但相識一場都會唔開心，希望佢安詳上路，家人節哀順變。」
此外，無綫收費台今日將播出劉家良遺作《七劍》及《醉馬騮》作致敬。