子珊揸流攤 子華捱5巴
徐子珊於新劇有場掌摑黃子華戲份，原來此乃子華悉心策劃，惟面對前輩，子珊不敢狠心落手，結果遭揶揄打得「流」，最後子華出動淚功，速令子珊受感染而熱淚盈眶，結果五take順利收貨，事後子珊笑指打到手痛，不諱言現實生活中很怕事！
徐子珊與黃子華於新劇《My盛Lady》有感情線，惟劇情講述二人相愛但卻偏偏說不出口，日前拍攝一場子珊逼令子華表白的戲份，埋位前見二人坐埋一邊密密斟，及後導演一聲令下roll機，子珊即七情上面向子華說出心底話，期間還送上一巴掌，子華亦谷出眼淚，子珊見狀更熱淚盈眶配合。
驚傷耳仔
原來該掌摑戲份乃子華特意加插，子珊透露子華為了該劇付出不少，二人演出時，對方不時站於其立場諗，繼而提出更好的演繹方法。
子珊透露：「掌摑係子華提出，真係好激動，搞到佢都喊埋，其實話晒子華係前輩，要我摑佢真係唔容易，仲要唔係打一次，就住打又話我打得假，我又唔想大把扯埋去，本來諗好打面珠，但子華就話應該由顴骨位打，我真係驚打到佢耳仔。」惟戰戰兢兢的她，一而再也未夠逼真，還被子華取笑「揸流攤」，為免無休止NG令子華面龐受損，子珊終把心一橫豁出去，子華亦以淚功引導子珊入戲，最終二人拍了五take後，順利完成該場戲份。
否認胸壓
問到是否摑得很暢快，子珊笑謂：「梗係唔係啦！不知幾唔好意思，打到我手都痛埋。（現實生活有冇試過呢啲情況？）冇啦！我本身好怕事，遇到咁樣一定掉頭走，最多係返屋企喊餐飽。」而除了掌摑戲份，子珊亦有一場胸壓子華場口，不過伊人卻否認如此「開放」，她謂：「場戲係我幫佢按摩，中間有人撞到先仆倒壓佢背脊啫！冇『胸壓』咁誇張，不過同子華合作成個幾月，熟悉咗後做對手戲都冇咁驚青。」
文：影視組