霆鋒贈老竇500萬勞斯萊斯

身家豐厚的謝霆鋒向來投資有道，除手揸逾4億物業，近年他頻頻投資舖位，早已成為中環擺花街舖王；月前他看準時機，出售早年以700萬購入、父親謝賢居住多年的西半山金徽閣單位，淨賺二千萬！據悉霆鋒出售金徽閣後，已四出物色各區豪宅樓盤，打算再為父親添置更佳的安樂窩，惟暫時仍未有心水選擇，孝順的霆鋒遂安排父親入住月租十多萬的半山豪宅陽明山莊。

今年8月便77歲的四哥交遊廣闊，喜歡經常四處去，向來對父親衣食住行也照顧得妥妥當當的霆鋒，月前豪擲500萬購下黑色勞斯萊斯名車贈予父親代步，出手闊綽！極為窩心的霆鋒為以四哥的名字「4」作為車牌，特地上網向車牌公司以二十多萬投了車牌「RR 4」套於新車上（RR代表Rolls-Royce），更聘請司機接載父親出入，免他揸車操勞，體貼周到。

霆鋒事業有成，坐擁逾四億物業，難怪贈父親靚車也綽綽有餘。（資料圖片）	霆鋒與老竇謝賢並無代溝，經常表現得老友鬼鬼。	霆鋒前晚與友人於灣仔飯敍後獨自離開。

載孫仔遊車河

四哥連日來已乘坐落地不足一個月的新車四處出巡，昨日他便由司機接載下前往金鐘歎茶，戴上黑超，披着紅色外套的他極為風騷，離開時見記者在場即揮手打招呼，再由司機接載到中環shopping。四哥下車時，被追問霆鋒豪贈勞斯萊斯一事，他興奮說：「好開心呀，個仔送架車畀我，不過我覺得仲欠啲嘢囉，（仲欠啲咩？）欠筆退休金囉，（阿仔冇畀家用你咩？）冇呀，（個仔送車畀你，驚唔驚拉姑呷醋？）唔會，拉姑都好開心。（阿仔有冇靜雞雞送嘢畀拉姑？）咁就唔知喇，佢做啲嘢成日都出人意表。」問四哥有否與兩個孫仔往遊車河時，他即說：「梗係有啦，尋日先同佢兩個出去玩咗半日，兩個孫仔大個咗好多，冇乜扭計，霆鋒同栢芝湊得好好，我好安心。」

戴超chok返歸

提到現時租住豪宅，是否會叫霆鋒送樓？四哥笑言：「唔會啦，我喺呢度住多3、4年都百年歸老啦，買乜樓吖。」至於霆鋒前晚則與友人於灣仔歎日本菜，及至晚上10時才見他離開，與父親一樣型爆的他，深夜時分仍黑超不離身，邊行邊chok上車。

文、攝：追蹤組