莉莉哥連斯 公主有骨氣

記：記者　　莉：莉莉哥連斯

記：曾演過一個角色與現實中的你頗為相似，同樣有個有名氣的爸爸，演出的感覺如何？

莉：係呀！感覺係我拍過最有意義嘅，接到之後同個角色搏鬥咗足足７個月，睇熟劇本再思考，最鍾意佢同爸爸嘅關係，個角色除咗我冇人做到(口架)喇！

記：入行多年，有冇想過叫爸爸幫手？

莉：冇呀！一直只想自己去做，從來冇諗過要爸爸幫我搵工作機會，的而且確，佢有能力可以幫手，不過，我想靠自己把握機會。

媽咪教腳踏實地

記：咁你有冇人生導師？

莉：哈哈！係我媽媽，佢完全唔關演戲事(口架)！不過，佢一直引導我嘅人生，教我應該點做，仲借用佢嘅「古董」添，佢有好多復古飾物，有Chanel又有Vivienne Westwood，未流行時已買落好多。另外，佢令我知道要腳踏實地，做自己就夠，呢個諗法對我、對荷里活呢個地方嚟講都好特別，佢真係我最好朋友。

記：擔演改編小說電影《魔都獵人：骸骨之城》（The Mortal Instruments： City of Bones），令人諗起同樣拍改編小說電影嘅珍妮花羅倫絲（Jennifer Lawrence），你點睇佢？

莉：佢係我朋友嚟！，正到不得了，覺得佢好有趣，其實識演員朋友都好得意，試鏡時會識到朋友，好似成日見到對方，就會問點解我哋唔出吓街呢？

遇狗仔隊扮鬼臉

記：成名後有冇諗到有狗仔隊跟拍會着得靚啲？

莉：就算喺洛杉磯，人人都着瑜伽褲好輕鬆，我唔會打扮太隨意外出，因為自己鍾意時裝，不過，就唔會因為狗仔隊影相而刻意打扮，對住佢哋，我反而鍾意扮鬼臉添！

跟得女友

童星出身的莉莉哥連斯自小就投身娛樂圈，難怪她正式入行後四度與型仔影星撻着，當中包括《吸血新世紀》（Twilight）「大隻仔」Taylor Lautner，《歌舞青春》（High School Musical）型男Zac Efron以及《歡樂合唱團》（Glee）男星Chord Overstreet，至於現任男友亦為《吸》片影星Jamie Campbell-Bower，早前男方訪港，莉莉就做了跟得女友，兩人於《魔》片中合作，更被工作人員大爆於片場煙韌晒恩愛，而兩人亦會再拍續集。

莉莉哥連斯Profile

出生地:英國吉爾福德

出生日期:1989年3月18日

參演電影:《守護有心人》、《魔鏡‧魔鏡:白雪公主決戰黑心皇后》

文：外娛組