舒淇籲發明星夢小心墮陷阱
【張嘉敏澳門直擊】舒淇昨日以代言人身份於澳門出席意大利運動品牌活動，同場的嘉賓還有鄭伊健，兩人分別乘坐貢多拉出場，但舒淇所穿的上衣竟與船夫一樣是橫間衫，她表示不會感到尷尬。
舒淇透露忙於拍攝電影《聶隱娘》，因不停轉景，經常要坐6、7小時車，令她pat pat受苦，笑言：「唔好好似《一代宗師》拍咁耐。」提到近日有內地脫毛膏盜用其肖像，她說：「都唔係第一次，我最驚係有人利用我哋拍戲嚟招募臨時演員，話一日有二千五至五千蚊人工，一睇就知唔係，唔知有咩企圖，如果想演戲嘅人一定要小心，尤其女仔一定要搵男仔陪，太危險，太多陷阱，依家社會太亂，啲人直情明目張膽，令我特別驚。」而伊健則表示已落實會與陳小春、謝天華、錢嘉樂和林曉峰幾位古惑仔兄弟，連同他5人於今年11月在紅館開演唱會。
此外，舒淇前晚獨自到中環行街掃貨，短短時間已大有斬獲，可能懶得拎，離開店後不久便折返店內放低一大袋戰利品，兩手fing fing再步出。