諸葛超市掃貨全程護肚
名模諸葛紫岐（Marie）早前在微博暗示有喜，全面停工安胎的Marie，昨日穿上孕味十足的娃娃裝，腳踏平底鞋，與傭人到沙田購買蔬果，驟眼看Marie似懷孕4、5個月，心情靚靚的她對記者提問都有問必答，難掩佗B的喜悅。
諸葛紫岐與Neway二太子薛嘉麟結婚一年多，早前Marie在微博暗示有喜，但未有透露懷孕幾多個月。被老公吩咐全面停工安胎的Marie，昨日下午四時與傭人到沙田商場逛超市，Marie穿上粉色娃娃花裙、牛仔褸及平底鞋，戴上墨鏡及口罩，孕味十足，驟眼看Marie似懷孕約4、5個月，佗B的Marie親自挑選新鮮蔬果，非常細心，由傭人推住購物車，最後買了數百元的食物，包括乳酪、提子、蔬菜等。現場所見Marie上落電梯都好小心，尤其人多的地方她更掩肚保護，逗留約30分鐘後離開。
未知佗仔定女
當見到記者上前恭喜時，Marie先感到愕然，其後除下口罩向記者微笑打招呼，問到她懷孕幾多個月及預產期？她邊行邊說：「唔講喇。（仔定女？）未知。（老公唔畀接job？）休息先。」當問到奶奶有否燉補品？她微笑點頭。其後她更向記者說再見，戴回口罩後到商場上落客區，登上七人車由司機接走，全程保持笑容的Marie難掩佗BB的喜悅。
文：名人組